பழைய வெள்ளியை விற்றுத்துள்ளும் மக்கள்.. இது புது டிரெண்டா இருக்கே..!!

இந்திய மக்களுக்கு எப்போதும் நிரந்தர சொத்தாக இருக்கும் தங்கம் மற்றும் வெள்ளி சமீப காலமாக முக்கியமான நிதி திரட்டும் கருவியாக மாறியுள்ளது. ஆம் தங்கம், வெள்ளி விலை உயர்வால் ஒருப்பக்கம் மக்கள் தொடர்ந்து வாங்கி வந்தாலும், மறுபுறம் இதை அடமானமாக வைத்து கடன் வாங்குவதும், கையில் இருக்கும் பழைய தங்கத்தை விற்பனை செய்து நிதி திரட்டுவது அதிகரித்துள்ளது.

பொதுவாக பழைய தங்கம் தான் அதிகளவில் சந்தையில் விற்கப்படும். ஆனால் தற்போது டிரெண்ட் மாறி வெள்ளியும் அதிகமாக விற்பனை செய்யப்பட்டு வருவது மக்கள் மத்தியில் புதிய மாற்றமாக பார்க்கப்படுகிறது.

இந்தியாவில் வெள்ளி விலை தாறுமாறாக உயர்ந்ததால், ஒரே வாரத்தில் சுமார் 100 டன் பழைய வெள்ளியை மக்கள் விற்றுவிட்டனர் என்று இந்தியா புல்லியன் அண்ட் ஜூவல்லர்ஸ் அசோசியேஷன் தெரிவித்துள்ளது. வழக்கமாக ஒரு மாதத்தில் 10 முதல் 15 டன் அளவிலான பழைய வெள்ளி மட்டுமே சந்தையில் விற்பனைக்காக வரும். ஆனால் இந்த வாரத்தில் மட்டும் பத்து மடங்கு அதிகரித்து 100 டன் வந்துள்ளது பெரும் ஆச்சரியத்தை ஏற்படுத்தியுள்ளது.

ரீடைல் சந்தையில் புதன்கிழமை வெள்ளி விலை கிலோவுக்கு ரூ.1,78,684 என்ற வரலாறு காணாத உச்சத்தைத் தொட்டது. வியாழக்கிழமை சற்று குறைந்து ரூ.1,75,730 ஆனாலும், சமீபத்தில் பதிவான குறைந்தபட்ச வெள்ளி விலையை ஒப்பிடுகையில் இப்போதும் 20 சதவீதம் அதிகமாகவே உள்ளது. இந்த விலை உயர்வு தான் மக்களை வீட்டில் இருந்த பழைய வெள்ளியை விற்கத் தூண்டியுள்ளது.

இதுக்குறித்து இந்தியா புல்லியன் அண்ட் ஜூவல்லர்ஸ் அசோசியேஷன் அமைப்பின் தேசிய செயலாளர் சுரேந்திர மேத்தா கூறுகையில், பழைய வெள்ளி விற்பனை அதிகரிக்க 3 முக்கிய காரணம் உள்ளது என்று விளக்குகிறார். 1. வெள்ளி விலை உயர்ந்ததால் லாபம் பார்க்கும் எண்ணத்துடன் விற்கப்படுகிறது. 2. திருமண சீசன் காரணமாக நகை வாங்கவும், வெள்ளி பொருட்களை வாங்குவும் விற்கப்படுகிறது. 3. வருடத்தின் இறுதியில் விடுமுறையை கொண்டாடவும், பயணச் செலவுக்காகவும் பணம் தேவையை பூர்த்தி செய்ய பழைய வெள்ளி விற்பனைக்கு வருகிறது என கூறுகிறார்.

தற்போது விற்பனைக்கு வரும் வெள்ளி பெரும்பாலானவை வீட்டில் பயன்படுத்தப்பட்ட பழைய பாத்திரங்கள், நகைகள், சிலை போன்ற ஸ்கிராப் வெள்ளிப் பொருட்களாகும்.

வெள்ளி விலை விரைவில் கிலோவுக்கு ரூ.2 லட்சத்தைக் கூட தாண்டும் என்று சந்தை நிபுணர்கள் கணிக்கும் இத்தகைய சூழ்நிலையில் மக்கள் வெள்ளியை விற்கின்றனர். இந்தியாவில் திருமண சீசன், பண்டிகை காலம் என்பதால் வெள்ளி நகைக்கு தேவையும் அதிகரிக்கும்.