பட்ஜெட் வெளியிடும் நேரத்தில் இப்படியா நடக்கனும்.. 3 மாத சரிவில் ஜிஎஸ்டி வசூல்..!

நாட்டின் சரக்குகள் மற்றும் சேவைகள் வரி வருவாய் தொடர்ந்து அதிகரித்து வந்த நிலையில் கடந்த மூன்று மாதங்களில் இல்லாத அளவுக்கு டிசம்பரில் குறைந்தது.

டிசம்பர் மாத ஜிஎஸ்டி மொத்த வசூல் கடந்த வருடத்தை காட்டிலும் சுமார் 10.28 சதவீதம் உயர்ந்து ரூ.1.65 லட்சம் கோடியாக இருந்தது என்று மத்திய நிதித்துறை அமைச்சகம் அறிவித்துள்ளது. 2022 ஆம் ஆண்டு டிசம்பரில் சரக்கு மற்றும் சேவை வரி வசூல் ரூ.1.50 லட்சம் கோடியாக இருந்துள்ளது.

2023 நவம்பர் மாதத்தில் ரூ.1.68 லட்சம் கோடியாகவும், அக்டோபரில் ரூ.1.72 லட்சம் கோடியாக இருந்த நிலையில் டிசம்பரில் இது குறைந்து விட்டது. ஜிஎஸ்டி அறிமுகம் செய்யப்பட்டதில் இருந்து இதுவரை 2023 அக்டோபர் மாதத்தில் தான் இரண்டாவது அதிகபட்சம் வசூல் அளவு எட்டப்பட்டது.

நவம்பர், 2023 முடிய 2023-24 நிதியாண்டுக்கான மொத்த ஜிஎஸ்டி வசூல் ரூ.13 லட்சத்து 32 ஆயிரத்து 440 கோடி ஆகும்., மாதத்துக்கு சராசரியாக ரூ1.66 லட்சம் கோடி. 2022-23ஆம் நிதியாண்டின் மொத்த ஜிஎஸ்டி வசூலை விட 11.9% அதிகம். சராசரியாக மாதத்துக்கு ரூ.1.49 லட்சம் கோடி.

அக்டோபரில் உள்நாட்டு பரிவர்த்தனைகள் முந்தைய ஆண்டில் இதே மாதத்தில் இருந்ததைக் காட்டிலும் 13 சதவீதம் அதிகம் இருந்தது.
டிசம்பர் மாத மொத்த ஜிஎஸ்டி வருவாயில் சிஜிஎஸ்டி ரூ.30,443 கோடி, எஸ்ஜிஎஸ்டி ரூ.37,935 கோடி, ஐஜிஎஸ்டி ரூ.84,255 கோடியாக இருந்தது. இது வெளிநாட்டு இறக்குமதியில் இருந்து வந்த ரூ.41,534 கோடியும் அடங்கும்.

மேலும் செஸ் வரியாக ரூ.12,249 கோடி வசூலிக்கப்பட்டுள்ளது. இதில் இறக்குமதி செய்யப்பட்ட சரக்குகளில் இருந்து ரூ.1079 கோடியும் அடங்கும். 2023-24 நிதியாண்டில் ஜிஎஸ்டி வசூல் ரூ.1.60 லட்சம் கோடியை ஏழாவது முறையாகத் தாண்டியுள்ளது.

இந்த நிதியாண்டில் 2023 டிசம்பர் மாத்துடன் மொத்த ஜிஎஸ்டி வசூல் ரூ.14.97 லட்சம் கோடியாகும். இது முந்தைய நிதியாண்டில் இதே காலகட்டத்தை விட 12 சதவீதம் அதிகமாகும்.

இதனிடையே ரூ.40,057 கோடி சிஜிஎஸ்டிக்காகவும், ரூ.33,652 கோடி எஸ்ஜிஎஸ்டிக்காகவும் மாநில அரசுகளுக்குப் பிரித்து தந்து விட்டதாக மத்திய அரசு கூறியுள்ளது.

வழக்கமான செட்டில்மெண்ட்களுக்குப் பிறகு டிசம்பர் 2023-ல் மத்திய மற்றும் மாநில அரசுகளின் மொத்த வருவாய் சிஜிஎஸ்டிக்கு ரூ.70,501 கோடியும், எஸ்ஜிஎஸ்டிக்கு ரூ.71,587 கோடியும் ஆகும். மாநில அரசுகளுக்குச் சேர வேண்டிய ஜிஎஸ்டி பங்கை முறையாக தந்துவிட்டோம் என்று மத்திய நிதி அமைச்சகம் தெரிவித்துள்ளது.