மத்திய அரசின் கஜானா நிரம்புது.. நேரடி, ஜிஎஸ்டி வரி வசூல் அமோகம்..!!

நடப்பு நிதியாண்டின் முதல் எட்டு மாதங்களில் மத்திய அரசின் நேரடி வரி வசூல் கணிசமான வளர்ச்சியை கண்டுள்ளது. மத்திய அரசு தரப்பில் வெளியான தகவல் அடிப்படையில் நவம்பர் 10 வரையிலான காலத்தில், நாட்டிந் நிகர நேரடி வரி வசூல் 12.92 லட்சம் கோடி ரூபாயாக உயர்ந்து, கடந்த ஆண்டின் இதே காலகட்டத்தை விட 7 சதவீதம் அதிகரித்துள்ளது.

இதேபோல் இக்காலக்கட்டத்தில் மொத்த நேரடி வரி வசூல் 15.35 லட்சம் கோடி ரூபாயாக பதிவாகி கடந்த ஆண்டை காட்டிலும் 2.15 சதவீதம் உயர்ந்துள்ளது, அதேசமயம் வரி திரும்ப செலுத்தும் தொகை அளவு 17.72 சதவீதம் குறைந்து 2.42 லட்சம் கோடி ரூபாயாக உள்ளது.

நேரடி வரிகளில் கார்ப்பரேட் வரி வசூல் முக்கிய பங்கு வகிக்கும் வேளையில் நவம்பர் 10 வரையிலான காலக்கட்டத்தில் நாட்டின் மொத்த கார்ப்பரேட் வரி 6.91 லட்சம் கோடி ரூபாயாக உள்ளது, அதில் டாக்ஸ் ரீபண்ட் தொகை 1.54 லட்சம் கோடி ரூபாயாகும். இதன் மூலமாக நிகர கார்ப்பரேட் வரி வசூல் 5.37 லட்சம் கோடி ரூபாயாக உள்ளது.

அதேபோல், கார்ப்பரேட் அல்லாத வரிகளான - தனிநபர், குடும்பங்கள், நிறுவனங்கள் மற்றும் உள்ளூர் அமைப்புகளிடமிருந்து வரும் வரி வசூல் மொத்தம் 8.08 லட்சம் கோடி ரூபாயாக அதிகரித்துள்ளது. இதில் டாக்ஸ் ரீபண்ட் 88,000 கோடி ரூபாய், எனவே இப்பரிவில் நிகர வரி வசூல் 7.19 லட்சம் கோடி ரூபாய்.

இதேபோல் கடந்த வாரம் மத்திய அரசு வெளியிட்டுள்ள ஜிஎஸ்டி வரி வசூல் அளவை பார்க்கும் போது அதிலும் வளர்ச்சி பாதை பதிவாகியுள்ளது. 2025 அக்டோபர் மாதத்தில், ஜிஎஸ்டி வசூல் 1.96 லட்சம் கோடி ரூபாயாக உயர்ந்து, முந்தைய ஆண்டின் அக்டோபரை விட 4.6 சதவீதம் அதிகரித்துள்ளது.

மேலும் வரி வசூலில் திரும்ப செலுத்தல் கழித்த பிறகு, நிகர ஜிஎஸ்டி வசூல் 1.69 லட்சம் கோடி ரூபாயாக உள்ளது, இது கடந்த ஆண்டை காட்டிலும் 0.6 சதவீதம் அதிகமாகும்.

மேலும் மொத்த ஜிஎஸ்டி வசூலில், சென்டரல் ஜிஎஸ்டி (சிஜிஎஸ்டி) 36,547 கோடி ரூபாயும், மாநில ஜிஎஸ்டி (எஸ்ஜிஎஸ்டி) 45,134 கோடி ரூபாயும், ஒருங்கிணைந்த ஜிஎஸ்டி (ஐஜிஎஸ்டி) 1,06,443 கோடி ரூபாயும் வசூலிக்கப்பட்டு உல்ளது. ஆனால் செஸ் வரி வசூல் 7,812 கோடி ரூபாயாக பதிவாகி கடந்த ஆண்டை காட்டிலும் சற்று குறைந்ததுள்ளது.

மேலும் நடப்பு நிதியாண்டின் ஏப்ரல்-அக்டோபர் வரையிலான காலத்தில், மொத்த ஜிஎஸ்டி வசூல் 13.89 லட்சம் கோடி ரூபாயாக உயர்ந்து, முந்தைய ஆண்டின் இதே காலக்கட்டத்தை காட்டிலும் 9 சதவீதம் அதிகமாகும். கடந்த ஆண்டு இதே காலக்கட்டத்தில் 12.74 லட்சம் கோடி ரூபாயாக பதிவானது.