மறைமுக செலவுகளை தவிர்த்து தங்கத்தில் அதிகம் சம்பாதிக்க வேண்டுமா.? நிபுணர் சொல்லும் டிப்ஸ்..!!

இந்திய குடும்பங்களில் தங்கம் மற்றும் வெள்ளிக்கு எப்போதும் ஒரு தனித்துவமான உணர்ச்சிபூர்வமான மற்றும் நிதி முக்கியத்துவம் உண்டு. நகை, நாணயம் அல்லது கட்டியாக இருந்தாலும், இந்த உலோகங்கள் பாதுகாப்பு, செல்வத்தைப் பாதுகாக்கும் சின்னமாகத் திகழ்கின்றன. இருப்பினும், பட்டயக் கணக்காளர் நிதின் கவுஷிக் முக்கிய எச்சரிக்கை ஒன்றை விடுத்துள்ளார்.

3 முக்கிய சவால்கள் : தங்கம் மற்றும் வெள்ளி முதலீட்டாளர்கள் கவனிக்க தவறும் 3 முக்கிய சவால்களை நிதின் கவுஷிக் எடுத்துரைத்துள்ளார். மேலும், பாரம்பரியத்திற்கும் செயல்திறனுக்கும் இடையில் சமநிலையை ஏற்படுத்த உதவும் டிஜிட்டல் மாற்றுகளையும் அவர் பரிந்துரைக்கிறார்.

விலை வித்தியாசம் : பிசிகல் தங்கம் அல்லது வெள்ளி வாங்கும்போது, சில்லறை விலையைச் செலுத்துகிறீர்கள். இதில் டீலரின் லாபம், 3% ஜிஎஸ்டி மற்றும் நகைகளுக்கு 5 முதல் 8% செய்கூலி ஆகியவை அடங்கும். ஆனால் அதனை விற்கும்போது, மொத்த விலையே உங்களுக்குக் கிடைக்கிறது.

உதாரணமாக, நீங்கள் ஒரு கிலோ தங்கத்தை ரூ. 1.22 லட்சத்திற்கு வாங்குகிறீர்கள். ஆனால் அதே தங்கத்தை உடனே விற்க நினைத்தால், விற்பனை விலை ரூ. 1.18 லட்சம் மட்டுமே கிடைக்கும். அதாவது, சந்தை விலை மாற்றமின்றியே ரூ. 4,000 இழப்பு நேரிடும் என்று தெரிவித்துள்ளார்.

இந்த வாங்கும்-விற்கும் விலை இடைவெளி காரணமாக, முதலீட்டாளர்கள் தங்கத்தின் விலை உயர்ந்தாலும் உடனே லாபம் காண முடியாது. முதலில், விலை அந்த இடைவெளியை (உதா: ரூ. 4,000) தாண்டி உயர்ந்த பிறகே அவர்கள் தங்கள் முதலீட்டு செலவை சமன் செய்ய முடியும். அதாவது, தங்கத்தின் விலை மாறாதபோது அவர்கள் ஏற்கனவே நஷ்டத்தில் இருப்பார்கள். பல நேரங்களில், இப்படிப்பட்ட விலை வித்தியாசம் மொத்த வருமானத்தின் 10% முதல் 15% வரை இழப்பை ஏற்படுத்தக்கூடும்

இதற்கு மாறாக டிஜிட்டல் தங்கம், சில்வர் ETF, மற்றும் மியூச்சுவல் ஃபண்ட் அடிப்படையிலான உலோக நிதிகள் போன்ற முதலீட்டு வழிகளில் வாங்கும்-விற்கும் விலை வித்தியாசம் மிகவும் குறைவு. பொதுவாக அது ஒரு கிலோவுக்கு ரூ. 500 முதல் ரூ. 2,000 வரை மட்டுமே இருக்கும். இதனால் முதலீட்டாளர்கள் தங்கம் அல்லது வெள்ளியின் விலை சிறிதளவு உயர்ந்தாலேயே லாபம் காண முடியும். மேலும், இவற்றில் செய்கூலி அல்லது சேமிப்பு செலவு போன்ற கூடுதல் கட்டணங்கள் இல்லை.

சேமிப்பு மற்றும் பாதுகாப்பு : பிசிகல் தங்கத்தை பாதுகாப்பாக சேமிக்க வேண்டும். இதற்காக வங்கி லாக்கர்கள் பயன்படுத்தப்படுகின்றன. இடத்தைப் பொறுத்து இதற்கு ஆண்டுக்கு ரூ. 1,000 முதல் ரூ. 10,000 வரை கட்டணம் வசூலிக்கப்படுகிறது.

மேலும், உங்கள் செல்வம் லாக்கரில் இருக்கும்போது நீங்கள் முழுமையாக நிம்மதியாக இருக்க முடியாது. திருட்டு, சேதம் அல்லது தவறாக வைத்தல் போன்ற கவலைகள் இருக்கும்.

ஆனால் கோல்டு இ.டி.எஃப் அல்லது டிஜிட்டல் தங்கம் போன்ற முதலீடுகளில் இந்த கவலைகள் இருக்காது. முதலீட்டாளர் தங்கத்தை மின்னணு முறையில் சொந்தமாக வைத்துக்கொள்கிறார். இதனால் தனிப்பட்ட சேமிப்பு பொறுப்புகள் இல்லை.

தூய்மை மற்றும் கழிவுகள் : பி.ஐ.எஸ் ஹால்மார்க் செய்யப்பட்ட தங்கத்தில் கூட, சோதனைச் செலவுகள் அல்லது உலோகக் கலவை குறித்த சந்தேகங்களால் மறுவிற்பனையின் போது 2 முதல் 5% வரை கழிவுகள் இருக்கலாம். நகைகளுக்கு இந்த இழப்பு 8 முதல் 10% வரை இருக்கும்.

ஆனால் கோல்டு இ.டி.எஃப் மற்றும் சில்வர் இ.டி.எஃப் போன்ற டிஜிட்டல் முதலீடுகள் இந்த கவலையை நீக்குகின்றன. அவை 99.5% அல்லது அதற்கு மேற்பட்ட தூய்மையான தங்கத்தால் முழுமையாக ஆதரிக்கப்படுகின்றன. இவை செபி (SEBI) ஒழுங்குபடுத்தப்பட்ட பெட்டகங்களில் சேமிக்கப்பட்டு, சுயாதீன காப்பாளர்களால் சரிபார்க்கப்படுகின்றன. இது உத்தரவாதமான தூய்மை மற்றும் உடனடி பரிவர்த்தனையை உறுதி செய்கிறது.

முதலீட்டாளர்கள் கவனத்திற்கு : மறைக்கப்பட்ட செலவுகளான ஜிஎஸ்டி, பராமரிப்புக் கட்டணம், லாக்கர் வாடகை மற்றும் மறுவிற்பனை கழிவுகள் ஆகியவற்றால் முதலீட்டாளரின் மூலதனத்தில் 10 முதல் 15% வரை இழக்க நேரிடும் என கவுஷிக் கூறுகிறார்.

திருமணம் அல்லது பரிசுகள் போன்றவற்றுக்கு பிசிகல் தங்கம் கலாச்சார மற்றும் உணர்ச்சிபூர்வமான ஈர்ப்பைக் கொண்டிருந்தாலும், இது சிறந்த நிதி முதலீடாக இருப்பது அரிது என்றும் அவர் கூறியுள்ளார்.

சாவரின் கோல்ட் பாண்ட்ஸ் (SGBs) போன்ற திட்டங்கள் 2.5% ஆண்டு வட்டியுடன், முதிர்வு வரை வைத்திருந்தால் மூலதன ஆதாய வரி இல்லை என்ற கூடுதல் நன்மையையும் வழங்குகின்றன. அதே சமயம், கோல்டு இ.டி.எஃப்-கள் ஆண்டுக்கு 0.3 முதல் 0.4% மட்டுமே நிர்வாக கட்டணமாக வசூலிக்கின்றன.