பைஜூஸ் கடன் பிரச்சனையை தீர்க்க வந்த மணிப்பால்.. 1400 கோடி முதலீடு..!!

மணிப்பால் கல்வி மற்றும் மருத்துவக் குழுமத் தலைவர் ரஞ்சன் பாய், பெரும் நிதி நெருக்கடியில் சிக்கியுள்ள எட்டெக் நிறுவனமான பைஜூஸ் குழுமத்தின் முக்கிய துணை நிறுவனமான ஆகாஷ் கல்வி நிறுவனத்தில் சுமார் ரூ.1,400 கோடி முதலீடு செய்துள்ளார்.

பெங்களூரை தலைமையிடமாக கொண்ட பைஜூஸ் நிறுவனம், அமெரிக்காவைச் சேர்ந்த டேவிட்சன் கெம்ப்னர் கேப்பிட்டல் மேனேஜ்மென்ட் நிறுவனத்திடம் ஆகாஷ் கல்வி நிறுவன பங்குகளை அடமானமாக வைத்து பெற்ற கடன் இந்த புதிய நிதியுதவி மூலம் தீர்க்கப்பட்டு உள்ளது. இதனால் பைஜூஸ் நிறுவனத்தின் முக்கிய பிரச்சனைகள் முடிவுக்கு வந்துள்ளது.

இந்த 1400 கோடி ரூபாய் முதலீட்டின் வாயிலாக ரஞ்சன் பாய் தலைமையிலான மணிப்பால் கல்வி மற்றும் மருத்துவக் குழுமம் ஆகாஷ் கல்வி நிறுவனத்தில் 25 முதல் 30 சதவீத பங்குகளையும், ஆகாஷ் நிர்வாக குழுவில் இரண்டு இடங்களைப் பெற வாய்ப்புள்ளது. இதன் மூலம் மணிப்பால் கல்வி மற்றும் மருத்துவக் குழுமம் தனது வர்த்தகத்தை விரிவாக்கம் செய்துள்ளது.

மணிப்பால் நிறுவனம் டேவிட்சன் கெம்ப்னர் நிறுவனத்திற்கு இருதரப்பு கடன் பரிவர்த்தனை மூலம் பரிமாற்றம் செய்யப்பட்டு உள்ளது. இதன் மூலம் ரஞ்சன் பாய், டேவிட்சன் கெம்ப்னர் வைத்திருந்த ஆகாஷின் அனைத்து மாற்ற முடியாத கடன் பத்திரங்களையும் (NCDs) வெள்ளிக்கிழமை NSE Cbrics தளத்தில் வாங்கினார்.

மேலும் இந்த முதலீடு, கடன் பத்திரங்கள் பரிமாற்றம் ஆகியவற்றுக்கான ஒப்புதலை பெற மணிப்பால் நிறுவனம் உடனடியாக CCI அமைப்பிடம் பெறும் முயற்சியில் இறங்க உள்ளது. ரஞ்சன் பாய் செலுத்திய 1400 கோடி ரூபாயில் பைஜூஸ் நிர்வாகம் டேவிட்சன் கெம்ப்னர் நிறுவனத்திடம் இருந்து பெற்ற 800 கோடி ரூபாய் கடனும், 600 கோடி ரூபாய் வட்டியும் அடங்கும். வட்டி தொகை மட்டும் வாங்கிய கடனில் 75 சதவீதம் அளவிற்கு உயர்ந்துள்ளது.

ரஞ்சன் பாய் தலைமையிலான மணிப்பால் நிறுவனத்தின் முதலீடு ஆகாஷ் நிறுவனத்தை சார்ந்தது, பைஜூஸ்-ன் தாய் நிறுவனமான Think and Learn நிறுவனத்தில் இல்லை என்பதை புரிந்துகொள்ள வேண்டும்.