ஜிஎஸ்டி வசூல் 1.67 லட்சம் கோடி.. வரலாற்று உச்சத்தில் வளர்ச்சி அளவீடு..!!

மத்திய அரசு ஒவ்வொரு மாத முடிவிலும் ஜிடிஎஸ் வரி வசூல் அளவீட்டை வெளியிட்டு வருவதோடு, நாட்டின் வர்த்தக வளர்ச்சியை இதன் மூலம் மக்களுக்கு பறைசாற்றி வருகிறது மோடி அரசு. அந்த வகையில் நவம்பர் மாத முடிவில் நாட்டின் மொத்த ஜிஎஸ்டி வசூல் கடந்த வருடத்தின் நவம்பர் மாதத்தை காட்டிலும் 15 சதவீதம் அதிகரித்து 1,67,929 கோடி ரூபாயாக உயர்ந்துள்ளது.

டிசம்பர் 1 ஆம் தேதி மாலை மத்திய நிதி அமைச்சகம் வெளியிடப்பட்ட அதிகாரப்பூர்வ அறிக்கையில் நவம்பர் 2023-க்கான ஜிஎஸ்டி வருவாய் வசூல் ரூ.1,67,929 கோடியாகவும், இது கடந்த வருடத்தை காட்டிலும் 15 சதவீத வளர்ச்சியை பதிவு செய்துள்ளது என்று தெரிவித்துள்ளது.

2023 நவம்பரில் மொத்த ஜிஎஸ்டி வரி வசூலான 1,67,929 கோடி ரூபாயில், சிஜிஎஸ்டி ரூ.30,420 கோடியும், எஸ்ஜிஎஸ்டி ரூ.38,226 கோடியும், ஐஜிஎஸ்டி ரூ.87,009 கோடியும் அடங்கும். இதில் முக்கியமாக ஐஜிஎஸ்டி-யில் பொருட்களின் இறக்குமதியில் வசூலான ரூ.39,198 கோடியும் வரியும் அடக்கம்.

மேலும் மத்திய அரசு வசூலிக்கும் செஸ் வரி பிரிவில் ரூ.12,274 கோடி திரட்டப்பட்டு உள்ளது. இதில் இறக்குமதி செய்யப்பட்ட பொருட்களின் இறக்குமதி வரியில் ஒரு பகுதியான செஸ் வரி ரூ.1,036 கோடியும் அடங்கும்.

2023 நவம்பர் மாதம் உள்நாட்டு வர்த்தகத்தின் மூலம் அதிக வரி வருவாய் பெற்றுள்ளது, குறிப்பாக கடந்த வருட அளவை காட்டிலும் 20 சதவீதம் அதிகமாகும். இதற்கு முக்கியமான காரணம் நாடு முழுவதும் பல்வேறு பண்டிகைகள் கொண்டாடப்பட்டது தான். மேலும் 2023-24 ஆம் நிதியாண்டில் மட்டும் தொடர்ந்து 6 வது முறையாக ஜிஎஸ்டி வரி வசூல் 1.60 லட்சம் ரூபாய் அளவீட்டை தாண்டுகிறது.

அக்டோபரில் ஜிஎஸ்டி வருவாய் 13 சதவீத வளர்ச்சி அடைந்து ரூ.1,72,003 கோடியாக இருந்தது. ஏப்ரல் 2023 இல் வரலாற்று உயர்வான ரூ.1,87,035 கோடியாக பதிவு செய்யப்பட்டது குறிப்பிடத்தக்கது. ஆனால் 2023 நவம்பர் தான் இதுவரையில் பதிவான அதிகப்படியான வளர்ச்சி அளவீடாகும் (15%).