மாலை 5 மணிக்கு நாட்டு மக்களுக்கு உரையாற்றும் பிரதமர்.. ஜிஎஸ்டி, H-1B, அமெரிக்க உறவுகள் இடம்பெறுமா?

பிரதமர் நரேந்திர மோடி (Narendra Modi) இன்று ஞாயிற்றுக்கிழமை மாலை 5 மணிக்கு நாட்டு மக்களுக்கு உரையாற்றுகிறார் என்று அதிகாரிகள் தெரிவித்துள்ளனர். நவராத்திரி பண்டிகையின் தொடக்கமும், புதிய ஜிஎஸ்டி விகிதக் குறைப்பு அமலுக்கு வரும் தினமும் இது என்பதால், அவரது உரை பெரும் எதிர்பார்ப்பை ஏற்படுத்தியுள்ளது.

முக்கிய அம்சங்கள்: பிரதமர் மோடி என்ன பேசப் போகிறார் என்பது குறித்து அதிகாரப்பூர்வ தகவல் எதுவும் வெளியிடப்படவில்லை. எனினும், அவரது உரையில் பின்வரும் முக்கிய அம்சங்கள் இடம்பெறலாம் என்று எதிர்பார்க்கப்படுகிறது

1. ஜிஎஸ்டி சீர்திருத்தங்கள்: நவராத்திரியின் முதல் நாளான செப்டம்பர் 22 (திங்கட்கிழமை) முதல், புதிய ஜிஎஸ்டி சீர்திருத்தங்கள் அமலுக்கு வருகின்றன. முந்தைய நான்கு அடுக்குகளிலிருந்து (5%, 12%, 18%, 28%) இரண்டு அடுக்குகளாக (5%, 18%) ஜிஎஸ்டி விகிதங்கள் குறைக்கப்படவுள்ளன. இதன் காரணமாக ஏராளமான அத்தியாவசியப் பொருட்களின் விலைகள் குறைய உள்ளன. இது குறித்து பிரதமர் மக்களுக்கு விளக்கம் அளித்து, அதன் பலன்களை எடுத்துரைக்கலாம்.

2. இந்தியா - அமெரிக்கா உறவுகள்: கடந்த சில மாதங்களாக, அமெரிக்காவுடனான இந்தியாவின் உறவுகளில் சற்றுப் பதற்றம் நிலவுகிறது. குறிப்பாக, ரஷ்ய கச்சா எண்ணெயை வாங்குவதற்காக புது தில்லி மீது வாஷிங்டன் 50% வரிகளை விதித்திருப்பது ஒரு முக்கிய காரணம். 2022 இல் உக்ரைன் மீதான ரஷ்யாவின் படையெடுப்பைத் தொடர்ந்து அமெரிக்காவும் பிற நாடுகளும் அதன் மீது தடைகளை விதித்துள்ளன. இந்தப் பின்னணியில், பிரதமர் மோடி அமெரிக்காவுடனான உறவுகள் மற்றும் இந்தியாவின் வெளியுறவுக் கொள்கை குறித்துப் பேசலாம்.

3. H-1B விசா விவகாரம்: டிரம்ப் நிர்வாகம், புதிய H-1B விசா விண்ணப்பங்களுக்கான வருடாந்திர கட்டணத்தை $100,000 (சுமார் ரூ.83 லட்சம்) ஆக உயர்த்தியது. இது H-1B விசா வைத்திருக்கும் பெரும்பாலான இந்தியர்கள் மத்தியில் குழப்பத்தையும் பீதியையும் தூண்டியது.

பின்னர், டிரம்ப் நிர்வாகம், $100,000 கட்டணம் தற்போதைய விசா வைத்திருப்பவர்களுக்குப் பொருந்தாது என்றும், புதிய மனுக்களுக்கு மட்டுமே ஒரு முறை கட்டணமாகச் செலுத்தப்படும் என்றும் தெளிவுபடுத்தியது.

இந்த விசா விவகாரம் குறித்துப் பிரதமர் தனது உரையில் கருத்து தெரிவிக்கலாம் அல்லது இந்திய நிபுணர்களுக்கு உறுதி அளிக்கலாம். சனிக்கிழமை அன்று, பிரதமர் மோடி, அமெரிக்காவின் H-1B விசா கட்டண உயர்வைக் மறைமுகமாகக் குறிப்பிட்டு, இந்தியாவின் மிகப்பெரிய எதிரி மற்ற நாடுகளைச் சார்ந்திருப்பதுதான் என்றும், தன்னிறைவு பெற வேண்டியதன் அவசியத்தையும் வலியுறுத்தியிருந்தார்.

4. தற்சார்பு இந்தியா: குறைக்கடத்திகள் (semiconductors) முதல் கப்பல் கட்டுமானம் வரையிலான துறைகளில் "தன்னிறைவு பெற வேண்டும்" என்ற தனது அழைப்பை பிரதமர் மோடி மீண்டும் வலியுறுத்தலாம். இந்தியாவின் பொருளாதார வளர்ச்சி மற்றும் எதிர்காலத் திட்டங்கள் குறித்தும் அவர் பேசலாம்.