துணிகளுக்கு ரூ.2,500க்கு மேல் பில் வந்தா ஜிஎஸ்டி சேமிக்க தனி தனியா பில் போடனுமா? உண்மை என்ன? #FactCheck

இந்தியாவில் ஜிஎஸ்டி வரிகள் குறைக்கப்பட்டு செப்டம்பர் 22ஆம் தேதி முதல் நடைமுறைக்கு வந்திருக்கிறது. நாம் அன்றாடம் பயன்படுத்தக்கூடிய பல்வேறு பொருட்களுக்கு விதிக்கப்பட்டு வந்த அதிகபட்ச ஜிஎஸ்டி வரி என்பது தற்போது பெருமளவில் குறைந்திருக்கிறது.

ஜிஎஸ்டி வரி: தற்போதைக்கு 5, 18, 40 என மூன்று விதமான ஜிஎஸ்டி வரி விகிதங்கள் மட்டுமே இந்தியாவில் நடைமுறையில் இருக்கின்றன . ஜிஎஸ்டி வரி விகித சீர்திருத்தம் என்பது பண்டிகை காலத்தில் வந்திருப்பதால் வீட்டு உபயோக பொருட்களை வாங்குபவர்கள் , துணிமணி எடுப்பவர்களுக்கெல்லாம் இந்த ஜிஎஸ்டி வரி திருத்தம் ஒரு பெரிய அளவிலான சேமிப்பை ஏற்படுத்தி தரும் என நம்பப்படுகிறது .

துணிகளுக்கு ஜிஎஸ்டி: தீபாவளி பண்டிகை என்றாலே அனைத்து குடும்பமும் முதலில் வாங்குவது புதிய ஆடைகளை தான். இந்த ஜிஎஸ்டி வரி திருத்தம் புதிய ஆடைகளை வாங்குபவர்களுக்கும் சேமிப்பை ஏற்படுத்தி தந்திருக்கிறது . 2,500 ரூபாய் வரையிலான விலைகொண்ட துணிகளுக்கான ஜிஎஸ்டி விகிதம் இதற்கு முன்பு 12 சதவீதமாக இருந்தது அது தற்போது 5 சதவீதம் என குறைக்கப்பட்டு இருக்கிறது. இதன் மூலம் நாம் 2500 ரூபாய் விலைக்குள் வாங்க கூடிய துணிகளுக்கு இதுநாள் வரை செலுத்தப்பட்டு வந்த வரி என்பது குறைந்திருக்கிறது . இது நமக்கு 7% தொகை சேமிப்பை ஏற்படுத்தி தரும்.

சமூகவலைதளங்களில் தகவல்: எனவே துணிமணி வாங்குபவர்கள் 2500 ரூபாய்க்குள் துணிகளை வாங்கிக் கொண்டால் ஜிஎஸ்டி வரி சேமிப்பின் பலனை அனுபவிக்க முடியும். இதற்கிடையே ஜிஎஸ்டி வரி திருத்தம் தொடர்பான ஒரு செய்தி சமூக வலைத்தளங்களில் வேகமாக பரவி வருகிறது . தீபாவளிக்கு துணி எடுக்க சென்றீர்கள் என்றால் ஒரு குடும்பத்திற்கு 6 ஆயிரம் ரூபாய்க்கு துணி வாங்கினீர்கள் என்றால் துணியை பிரித்து கொடுத்து மூன்று பில் போடுங்கள் 2500 ரூபாய் , 2500 ரூபாய் என தனித்தனியாக பிரித்து பில் போட்டால் ஜிஎஸ்டி வரி சேமிக்க முடியும் என ஒரு செய்தி சமூக வலைத்தளங்களில் வேகமாக பரவி வருகிறது.

தனி தனியா பில் போடனுமா? :அதாவது 2500 ரூபாய்க்கு மேல் பில் போட்டால் நீங்கள் அதற்கு 18 சதவீத ஜிஎஸ்டி செலுத்த வேண்டும் , 2500க்குள் பில் போட்டால் 5% ஜிஎஸ்டி செலுத்தினால் போதும் என ஒரு தகவல் வாட்ஸ் அப் ,பேஸ்புக், இன்ஸ்டாகிராம் உள்ளிட்ட பக்கங்களில் வேகமாக வலம் வருகிறது. இது உண்மை தானா என்பது குறித்து குட் ரிட்டர்ன்ஸ் தமிழ் ஆய்வு செய்தது.

விற்பனையாளர்கள் விளக்கம்: இது தொடர்பாக ஓசூர் சென்னை சில்க்ஸ் நிறுவனத்தை தொடர்பு கொண்டு குட் ரிட்டர்ன்ஸ் தமிழ் பேசியது, அப்போது இது ஒரு பொய்யான செய்தி என்ற விளக்கத்தை அவர்கள் அளித்தார்கள் . அனைத்து துணி கடைகளிலுமே நாம் வாங்கக்கூடிய துணிகளுக்கு ஒவ்வொரு துணிக்குமான விலை அதற்கான ஜிஎஸ்டி என்றுதான் பில் போடுவார்களே தவிர மொத்தமாக கணக்கிட்டு மொத்த விலைக்கு ஜிஎஸ்டி போட மாட்டார்கள் என விளக்கம் தந்துள்ளனர்.

இது தான் உண்மை: உதாரணமாக நீங்கள் ஒரு சுடிதார் ,ஒரு ஷர்ட், ஒரு பேன்ட் என வாங்குகிறீர்கள் என்றால் சுடிதாரின் விலை அதற்கான ஜிஎஸ்டி , பேன்ட் விலை அதற்கான ஜிஎஸ்டி, ஷர்ட் விலை அதற்கான ஜிஎஸ்டி என்றுதான் பில் போடுவார்களே தவிர மொத்தமாக மூன்றுக்கும் விலை போட்டுவிட்டு அந்த மொத்த தொகைக்கு ஜிஎஸ்டி போட மாட்டார்கள் என விளக்கம் தந்திருக்கின்றனர்.

புடவைகளுக்கு 5% ஜிஎஸ்டி: அதே வேளையில் புடவைகளுக்கு மட்டும் 2500 ரூபாய்க்கு மேல் அதன் விலை இருந்தாலும் அதனை ஃபேப்ரிக்காக கருதி அதற்கு 5 சதவீதம் மட்டும்தான் ஜிஎஸ்டி போடப்படும் என விளக்கம் தந்திருக்கின்றனர் . மற்றபடி நாம் வாங்கக்கூடிய அனைத்து விதமான ஆடைகளுக்கும் அதன் விலை 2500 ரூபாய்க்குள் இருந்தால் 5% ஜிஎஸ்டி 2500 ரூபாய்க்கு மேல் இருந்தால் 18 சதவீதம் ஜிஎஸ்டி என்று தான் வசூலிக்கப்படும். பில்லை பிரித்து வாங்குவதால் ஜிஎஸ்டி குறைந்துவிடாது.

ஜிஎஸ்டி சேமிக்க வழி: ஒருவேளை நீங்கள் ஜிஎஸ்டி குறைப்பு பலனை அனுபவிக்க வேண்டும் என எண்ணுகிறீர்கள் என்றால் நீங்கள் வாங்கக்கூடிய அந்த துணியின் விலை 2500 ரூபாய்க்குள் இருப்பதை உறுதி செய்து கொள்ளுங்கள் அந்த வகையில் உங்களுக்கு 5 சதவீதம் மட்டுமே ஜிஎஸ்டி வரும். எனவே சமூக வலைத்தளங்களில் இப்படி நீங்கள் துணியை வாங்கிவிட்டு மூன்று பில்லாக போடுங்கள் நான்கு பில்லாக போடுங்கள் என வர கூடிய செய்தியில் உண்மை கிடையாது.