டிசிஎஸ் ஊழியர்களுக்கு ஜாக்பாட்.. செப்டம்பர் 1 முதல் சம்பள உயர்வு..!

இந்தியாவின் மிகப்பெரிய தகவல் தொழில்நுட்ப சேவை நிறுவனமான டாடா கன்சல்டன்சி சர்வீசஸ் (TCS), தனது பெரும்பாலான ஊழியர்களுக்கு 4.5% முதல் 7% வரை சம்பள உயர்வு அறிவித்துள்ளதாகத் தகவல்கள் வெளியாகியுள்ளன. ஊதிய உயர்வுக்கான கடிதங்களை டாடா குழும நிறுவனம் திங்கட்கிழமை மாலை முதல் ஊழியர்களுக்கு அனுப்பத் தொடங்கியதாகவும், இந்த ஊதிய உயர்வு செப்டம்பர் மாதத்திலிருந்தே இருக்கும் என்றும் கூறப்படுகிறது.

கடந்த சில மாதங்களாகவே, தகவல் தொழில்நுட்பத் துறையில் பல்வேறு விதமான செய்திகள் வெளிவந்து கொண்டிருந்தன. சந்தை நிலவரங்கள் சரியில்லாத காரணத்தால், சம்பள உயர்வுகளை ஒத்திவைப்பதாக சில நிறுவனங்கள் அறிவித்திருந்த நிலையில், டிசிஎஸ்ஸின் இந்த அறிவிப்பு ஊழியர்களுக்குப் பெரும் மகிழ்ச்சியையும், நம்பிக்கையையும் அளித்துள்ளது.

சிறப்பாகச் செயல்படுபவர்களுக்கு அதிக ஊதிய உயர்வு: சம்பள உயர்வு குறித்து ஊடகங்களில் வெளியான அறிக்கைகளின்படி, இந்த உயர்வுக்குத் தகுதியான பெரும்பாலான ஊழியர்கள் நிறுவன படிநிலையின் கீழ் மற்றும் நடுத்தர நிலைகளைச் சேர்ந்தவர்கள். அவர்களுக்கு சராசரியாக 4.5% முதல் 7% வரை ஊதிய உயர்வு வழங்கப்பட்டுள்ளது.

அதே சமயம், சிறப்பாகச் செயல்படும் ஊழியர்களுக்கு 10க்கும் அதிகமான ஊதிய உயர்வு: வழங்கப்பட்டுள்ளதாகவும் தகவல்கள் தெரிவிக்கின்றன. இது, ஊழியர்களின் கடின உழைப்பையும், அர்ப்பணிப்பையும் நிறுவனம் அங்கீகரிக்கிறது என்பதைக் காட்டுகிறது. ஜூன் காலாண்டில் நிறுவனத்தின் பணியாளர் விலகல் விகிதம் 13.8% ஆக அதிகரித்துள்ளதாக டிசிஎஸ் நிறுவனம் தெரிவித்திருந்த நிலையில், இந்த சம்பள உயர்வு ஊழியர்களைத் தக்கவைத்துக் கொள்ளும் ஒரு முக்கிய நடவடிக்கையாகவும் பார்க்கப்படுகிறது.

சந்தை நிலவரமும், நிறுவனத்தின் முடிவும்: சமீப காலமாக, தொழில்நுட்ப நிறுவனங்கள் அதிக பணியமர்த்தல்களைக் குறைத்து, செலவுகளைக் கட்டுப்படுத்தத் தொடங்கின. இதனால், இந்தத் துறையில் பணியாற்றும் பல ஊழியர்களுக்கு சம்பள உயர்வு ஒத்திவைக்கப்படுமோ அல்லது குறைக்கப்படுமோ என்ற அச்சம் நிலவியது. இந்தச் சூழலில், டிசிஎஸ்ஸின் இந்த அறிவிப்பு, அதன் ஊழியர்களுக்கு மட்டுமல்ல, ஒட்டுமொத்த ஐடி துறைக்கும் ஒரு முக்கிய செய்தியாக அமைந்துள்ளது.

நிறுவனத்தின் இந்த முடிவு, அதன் வலுவான நிதி நிலைமையையும், எதிர்கால வளர்ச்சி குறித்த நம்பிக்கையையும் பிரதிபலிக்கிறது. சந்தை சவால்கள் இருந்தபோதிலும், திறமையான ஊழியர்களைத் தக்கவைத்துக்கொள்வதும், அவர்களுக்கு ஊக்கமளிப்பதும் நிறுவனத்தின் வளர்ச்சிக்கு மிகவும் அவசியம் என்பதை டிசிஎஸ் உணர்ந்துள்ளது.

டிசிஎஸ்ஸின் இந்தச் சம்பள உயர்வு, நாட்டின் மற்ற தொழில்நுட்ப நிறுவனங்களையும் இதேபோன்ற நடவடிக்கைகளை எடுக்கத் தூண்டக்கூடும் என்று தொழில்துறை நிபுணர்கள் எதிர்பார்க்கின்றனர். இது, ஒட்டுமொத்த ஐடி துறையில் உள்ள ஊழியர்களுக்குப் புதிய நம்பிக்கையையும், நேர்மறையான மனநிலையையும் உருவாக்கும் என்பதில் சந்தேகமில்லை.