தங்கத்தின் தேவை அதிகரிக்க என்ன காரணம்..? உலகச் சந்தையின் அச்சமா..? பின்னணியில் அதிர்ச்சி தகவல்..!!

உலக அளவில் எப்போது என்ன நடக்கும் என்ற பயமும் குழப்பமும் அதிகமாக இருப்பதால், மக்கள் தங்கள் பணத்தைக் காப்பாற்றிக்கொள்ளப் பாதுகாப்பான வழிகளைத் தேடுகிறார்கள். அதனால்தான், தங்கம் இப்போது மிகப்பெரிய அளவில் விலை ஏறி, புதிய உச்சங்களைத் தொட்டுள்ளது. கடந்த இரண்டு ஆண்டுகளில் தங்கத்தின் விலை கிட்டத்தட்ட இரண்டு மடங்குக்கும் மேலாக உயர்ந்திருக்கிறது.

2025 செப்டம்பரில் ஒரு அவுன்ஸ் தங்கம் சராசரியாக 3,665 டாலர் என்று இருந்த நிலையில், அக்டோபர் மாதத்தில் அது 4,000 டாலரை தாண்டிவிட்டது. இந்த விலை உயர்வு தற்காலிகமானதல்ல. இது உலகப் பொருளாதாரம், நாடுகளின் பணம் (நாணய மதிப்பு), மற்றும் அரசியல் பிரச்சனைகள் பற்றிய பெரிய கவலைகளைக் காட்டுகிறது என்று கேர்எட்ஜ் குளோபல் ரேட்டிங்ஸ் என்ற ஆய்வு நிறுவனம் கூறியுள்ளது.

தங்கம் இப்போது வெறும் நகை அல்ல : தங்கம் இப்போது ஆபரணம் என்ற நிலையில் இருந்து மாறி, பணத்தைக் காப்பாற்றும் கேடயமாக மாறியுள்ளது. விலைவாசி உயர்வு மற்றும் சந்தையில் ஏற்படும் திடீர் மாற்றங்கள் குறித்த பயம் காரணமாக, 2025 ஆம் ஆண்டின் முதல் 6 மாதங்களில் மட்டும் தங்கத்தின் மீது முதலீடு செய்தவர்களின் எண்ணிக்கை, கடந்த 2024 ஆம் ஆண்டு முழுவதிலும் செய்யப்பட்ட முதலீட்டுக்குச் சமமாக இருக்கிறது.

மத்திய வங்கிகளுக்கு பாதுகாப்பான பண இருப்பாகவும், முதலீட்டாளர்களுக்கு நம்பிக்கையான சொத்தாகவும் தங்கம் திகழ்கிறது. ஆனால், விலை தாறுமாறாக ஏறியதால், நகை வாங்கும் ஆர்வம் இப்போது சற்று குறைந்துள்ளது.

டாலர் பலவீனமே தங்கத்திற்கு பலம் : அமெரிக்க டாலரின் மதிப்பு குறைவதுதான் தங்கம் விலை உயர முக்கிய காரணம். உலக வர்த்தகத்தில் அமெரிக்க டாலரின் பயன்பாடு இப்போது குறைந்து வருகிறது. 2000 ஆம் ஆண்டில் உலக நாடுகள் சேமித்து வைத்திருந்த பணத்தில் 71.1% டாலராக இருந்தது. ஆனால், 2024-ல் அது 57.8% ஆக குறைந்துள்ளது. அதாவது, உலக நாடுகள் டாலரை நம்புவதை குறைத்துவிட்டன. அரசியல் சண்டைகளில் சிக்காத, விலைவாசி உயர்வை எதிர்த்து நிற்கும் ஒரு நடுநிலையான சேமிப்புக் கிடங்காக தங்கம் இருப்பதால், அதன் மீதான ஈர்ப்பு அதிகரித்துள்ளது.

உலக நாடுகள் ஏன் தங்கத்தை வாங்குகின்றன..?:மத்திய வங்கிகள் 2024-ல் வாங்கிய தங்கத்தின் அளவு, வழக்கமான அளவைவிட இரண்டு மடங்கு அதிகம். ரஷ்யா உக்ரைனைத் தாக்கியபோது, அதன் வெளிநாட்டுப் பணம் முடக்கப்பட்டது. இதுபோல, அரசியல் சண்டைகள் வரும்போது டாலரில் உள்ள பணம் பாதுகாப்பாக இருக்காது என்று உலக நாடுகள் இப்போது யோசிக்க ஆரம்பித்துள்ளன. அதனால், தங்கள் நாட்டிலேயே பாதுகாப்பாக வைக்கக்கூடிய தங்கத்தை வாங்குவதில் வளர்ந்து வரும் நாடுகள் ஆர்வம் காட்டுகின்றன.

BRICS நாடுகள் முன்னிலை : சமீபத்தில் அதிக தங்கம் வாங்கிய முதல் 10 நாடுகளில், 6 நாடுகள் BRICS குழுவில் உள்ளன.

இந்தியர்களின் தங்க மோகம் : இந்தியாவில் தங்கம் உற்பத்தி குறைவு. அதனால், நாம் பயன்படுத்தும் தங்கத்தில் 82% வெளிநாட்டில் இருந்து இறக்குமதி செய்யப்படுகிறது. விலை எவ்வளவு உயர்ந்தாலும், பண்டிகை காலத் தேவை காரணமாக செப்டம்பர் 2025-ல் தங்க இறக்குமதி கடந்த 10 மாதங்களில் இல்லாத உச்சத்தைத் தொட்டது. சந்தை எப்படி இருந்தாலும், இந்தியக் குடும்பங்களுக்குத் தங்கம்தான் பெரிய நம்பிக்கை தரும் சேமிப்பாக உள்ளது.

மக்கள் மத்தியில் நம்பிக்கை குறையும்போதுதான் தங்கம் விலை உயரும். இப்போது நடக்கும் தங்கத்தின் ஏற்றம், உலக அளவில் உள்ள பணவீக்கப் பயம், பொருளாதார மந்தநிலை, அதிக கடன் மற்றும் அரசியல் குழப்பம் ஆகியவற்றைக் காட்டுகிறது. பழைய பொருளாதார விதிகள் இப்போது பலிக்காது என்று முதலீட்டாளர்களும், நாடுகளும் முடிவுக்கு வந்துவிட்டன. எனவே, நிலைமை தெளிவாகும் வரை தங்கத்தின் தேவை மிக பலமாக இருக்கும் என்று கேர்எட்ஜ் ஆய்வு கூறியுள்ளது.