அதிரடியாய் குறைந்து வரும் இருசக்கர வாகனம், சிறிய கார்கள் விலை.. ஜிஸ்டி விலை குறைப்பால் ஜாக்பாட்.!!

சரக்கு மற்றும் சேவை வரியில் (ஜிஎஸ்டி) செய்யப்பட்ட சமீபத்திய திருத்தங்கள், இந்தியாவின் வாகனத் துறைக்கும், வாங்குபவர்களுக்கும் பெரும் மகிழ்ச்சியை அளித்துள்ளன. இந்த மாற்றத்தின் மூலம் இரு சக்கர வாகனங்கள் மற்றும் சிறிய ரக கார்களின் விலைகள் 10%க்கும் மேல் குறைய வாய்ப்புள்ளது. இது வாடிக்கையாளர்களிடையே ஒரு புதிய நம்பிக்கையை ஏற்படுத்தியுள்ளது.

350 சிசி வரையிலான இரு சக்கர வாகனங்கள் மற்றும் சிறிய கார்களுக்கான ஜிஎஸ்டி விகிதம் 28%லிருந்து 18%ஆகக் குறைக்கப்பட்டுள்ளது. இதேபோல், வாகன உதிரிபாகங்களுக்கான ஜிஎஸ்டி விகிதமும் 28%லிருந்து 18%ஆக குறைக்கப்பட்டுள்ளது. இந்த வரி குறைப்பின் பயன்களை வாடிக்கையாளர்களுக்கு முழுமையாக வழங்க, வாகன உற்பத்தி நிறுவனங்கள் அவற்றின் தயாரிப்புகளின் விலைகளைக் குறைக்க முடிவு செய்துள்ளன.

வாகனங்களுக்கும், அதன் பாகங்களுக்கும் உள்ள இரட்டை வரி குறைப்பு, குறிப்பாக தொடக்க நிலை மற்றும் பயணிகள் வாகனப் பிரிவுகளில் விலைக் குறைப்புக்கான வாய்ப்புகளை அதிகரித்துள்ளது.

இந்திய ஆட்டோமொபைல் உற்பத்தியாளர்கள் சங்கத்தின் தலைவர் சைலேஷ் சந்திரா இது குறித்துக் கூறுகையில், "வாகனங்களை, குறிப்பாக தொடக்க நிலை பிரிவில், மிகவும் மலிவு விலையில் மாற்றுவது, முதல் முறையாக வாங்குபவர்களுக்கும், நடுத்தர வருமானக் குடும்பங்களுக்கும் கணிசமாகப் பயனளிக்கும். இது தனிப்பட்ட போக்குவரத்திற்கான அணுகலை மேலும் எளிதாக்கும்," என்று தெரிவித்தார்.

இந்த வரி குறைப்பு, இரு சக்கர வாகனங்களின் விற்பனையில் ஒரு புதிய புரட்சியை ஏற்படுத்தும் என எதிர்பார்க்கப்படுகிறது. குறிப்பாக கிராமப்புற மற்றும் சிறு நகர்ப்புறப் பகுதிகளில் இரு சக்கர வாகனங்கள் பொதுவான போக்குவரத்து சாதனமாக உள்ளன. குறைந்த விலைகள் இளைஞர்கள், மாணவர்கள் மற்றும் பணியாளர்களுக்கு பைக்குகளை எளிதாக அணுகும் வகையில் அமையும்.

மேலும், விவசாயிகள், சிறு வணிகர்கள், தினசரி கூலித் தொழிலாளர்கள் எனப் பலரும் தங்களின் அன்றாடப் பயணங்களுக்கு இரு சக்கர வாகனங்களையே அதிகம் சார்ந்துள்ளனர். இவர்களுக்கும் இந்த விலை குறைப்பு பெரும் பயனளிக்கும். இது பொருளாதார வளர்ச்சிக்கும், தனிநபர் மேம்பாட்டிற்கும் வழிவகுக்கும்.

இதேபோல, இரண்டாம் மற்றும் மூன்றாம் நிலை நகரங்களில் அதிக விற்பனை அடையும் சிறிய ரக கார் பிரிவும், மலிவு விலை மேம்பாட்டால் வேகம் பெறும். இந்த வகை கார்கள் இப்போது மலிவான விலையில் கிடைப்பதால், முதல் முறையாக கார் வாங்குபவர்கள் ஊக்கமடைவார்கள். இது குடும்ப போக்குவரத்து வசதிகளை விரிவுபடுத்தும்.

இந்த வரி குறைப்பு, சிறிய நகரங்களில் விற்பனையைத் தூண்டி, டீலர்ஷிப்கள், சேவை மையங்கள் மற்றும் நிதி நிறுவனங்கள் முழுவதும் தேவை அதிகரிக்க வழிவகுக்கும். இது வாகனத் துறைக்கு ஒரு புதிய உத்வேகத்தை அளிக்கும்.