தங்கத்தை இப்போது வாங்கலாமா? விற்கலாமா? முதலீட்டாளர்கள் லாபம் பார்க்க நிபுணர் கொடுக்கும் டிப்ஸ்..!!

சர்வதேச சந்தையில் தங்கத்தின் விலை தற்போது சற்று குறைந்து, பலவீனமாக வர்த்தகமாகி வருகிறது. இந்த நிலவரத்தை கருத்தில் கொண்டு, தங்கத்தில் முதலீடு செய்பவர்கள் மற்றும் வர்த்தகர்கள் ஒரு குறிப்பிட்ட உத்தியை கடைப்பிடிக்கலாம் என்று LKP செக்யூரிட்டீஸ் நிறுவனத்தின் நிபுணர் ஜடீன் திரிவேதி அறிவுறுத்தியுள்ளார். அதாவது, "தங்கம் விலை அதிகரிக்கும்போது அதை விற்று லாபம் ஈட்டுவதே" சிறந்தது என்பதை அவர் வலியுறுத்தியுள்ளார்.

தடுமாறும் தங்கம் : MCX சந்தையில் தங்கம் ஃபியூச்சர்ஸ் விலை சுமார் ரூ.1,30,000 என்ற நிலைக்கு அருகில் வர்த்தகமாகிறது. ஆனால், ஒரு குறிப்பிட்ட விலையை தாண்டி அதிகரிக்க முடியாமல் தடுமாறுகிறது. இது தங்கத்தின் விலை மேலும் உயர வாய்ப்பில்லை என்பதை காட்டுகிறது. தொழில்நுட்ப ஆய்வுகளின்படி, தங்கம் வாங்குபவர்களைவிட விற்பனையாளர்களே இப்போது சந்தையில் ஆதிக்கம் செலுத்தி வருகின்றனர்.

வர்த்தக உத்தி :நிபுணரின் பரிந்துரைப்படி, வர்த்தகர்கள் ரூ.1,30,400 என்ற விலைக்கு அருகில் தங்கத்தை விற்கலாம். இந்த உத்தி தோல்வியடையும் பட்சத்தில், அதனால் ஏற்படும் இழப்பை தவிர்க்க, ரூ.1,31,500 என்ற விலையை தடுப்பு விலையாக (Stop-Loss) வைக்க வேண்டும். அதேசமயம், தங்கத்தின் விலை ரூ.1,29,000 வரை குறையலாம் என எதிர்பார்க்கப்படுகிறது.

தொழில்நுட்ப காரணிகள் சொல்வது என்ன..?: தங்கத்தின் விலை குறையும் என்பதைத் தொழில்நுட்பக் காரணிகள் தெளிவாக உணர்த்துகின்றன. குறுகிய கால விலைப் போக்கை காட்டும் 8 நாள் மற்றும் 21 நாள் சராசரிகள் (EMAs) இரண்டும் தற்போது ஒன்றுக்கொன்று மிக அருகில் வந்து, நகர்கின்றன. இது வாங்குபவர்களுக்கும் விற்பவர்களுக்கும் இடையே சந்தையில் ஒரு முடிவெடுக்க முடியாத நிலை இருப்பதையும், வாங்கும் Momentum குறைந்திருப்பதையும் காட்டுகிறது.

தங்கம் அதன் மத்திய பொலிஞ்சர் பேண்டின் (Mid-Bollinger Band) கீழே சரிந்துவிட்டது. இது, விலை சரியும் என நினைப்பவர்களின் ஆதிக்கம் அதிகரிப்பதை உறுதி செய்கிறது. சந்தை வேகத்தை காட்டும் RSI 50.3 என்ற நடுநிலை அளவில் உள்ளது. அதேபோல, MACD என்ற குறியீடும் விலை மேலும் சரியும் என்ற எதிர்மறை உணர்வையே காட்டுகிறது. வாங்குவதற்கான ஆர்வம் குறைவாக இருப்பதால், விலை சற்றே உயர்ந்தாலும் அது நீடிக்காது.

உயர்ந்த விலைப் புள்ளிகளில் தங்கம் மீண்டும் மீண்டும் தள்ளப்படுவதால், குறுகிய காலத்தில் அதன் விலை சரியவே அதிக வாய்ப்புள்ளது. ரூ.1,30,750-க்குக் கீழே வர்த்தகம் நீடிக்கும் வரை, விலை போக்கு பலவீனமாகவே இருக்கும். மேலும், ரூ.1,29,800-க்கு கீழே நிலைபெற்றால், ரூ.1,28,800 வரை குறையவும் வாய்ப்புள்ளது. எனவே, வர்த்தகர்கள் மிகுந்த கவனத்துடன் இருக்க வேண்டும் என்று அறிவுறுத்தப்பட்டுள்ளது.