இந்தியாவில் ஏன் தங்கம் விலை உயர்கிறது? - உலக தங்க கவுன்சில் தலைவர் கொடுக்கும் விளக்கம்

இந்தியாவில் தங்கம் விலை கடந்த 6 மாதங்களில் பல மடங்கு உயர்ந்துவிட்ட நிலையில் அதற்கு என்ன காரணம் என்பதை உலகத் தங்க கவுன்சில் தலைமைச் செயல் அதிகாரி டேவிட் டைட், ரைசிங் பாரத் உச்சி மாநாட்டில் தெரிவித்துள்ளார்.

தங்க விலை உயர்வுக்கு புவிசார் பதற்றங்கள், அரசுகளுக்கு இருக்க கூடிய கடன் அளவுகள் உயர்வு, மத்திய வங்கிகள் தங்கம் வாங்கியது ஆகியவை முக்கியக் காரணங்கள் என டைட் சுட்டிக்காட்டினார். புவிசார் அரசியல் நிச்சயமற்ற தன்மையே முதல் முக்கிய காரணம் என்ற அவர், கட்டுக்கடங்காத அரசு கடன்கள் குறித்த ஆழமான அச்சம் முதலீட்டாளர்களை தங்கத்தை நோக்கி தள்ளுகிறது என்றார். இதனால் டிமாண்ட் அதிகமாகி இந்திய சந்தையிலும் தங்கம் விலை உயர்ந்தது என கூறினார்.

கடந்த மூன்று ஆண்டுகளாக, மத்திய வங்கிகள் ஆண்டுக்கு தோராயமாக 1,000 டன் தங்கத்தை வாங்கியுள்ளன; இது அடுத்து வரும் ஆண்டுகளிலும் தொடரும். "இந்த தங்க விலை உயர்வு அனைத்திலும் கடன் ஊடுருவுகிறது," என்று டைட் கூறியுள்ளார். அமெரிக்கப் பத்திர வருவாய் சரிவுகள், பணவீக்கத்தால் அல்லாமல், அரசாங்கங்களின் கடன் மேலாண்மை திறன் பற்றிய கவலைகளாலேயே உருவாகின்றன என்றார்.

பல்வேறு நாடுகளின் மத்திய வங்கிகள் தங்க இருப்புகளை அதிகரிக்கின்றன. மேற்கத்திய வங்கிகளை ஒப்பிடுகையில் இந்திய மத்திய வங்கி தங்கம் வாங்குவதில் பின்தங்கியே உள்ளது என டைட் குறிப்பிட்டார். உலகளாவிய தங்கத்தின் தேவை கடந்த ஆண்டு உச்சத்தை எட்டியது என டைட் தெரிவித்தார்.

2025ல் இந்தியாவில் மொத்தத் தங்கத்தின் தேவை 711 டன்னாகப் பதிவானது. விலை உயர்வால் நகைத் தேவை குறைந்தாலும், தங்கக் கட்டிகள் மற்றும் நாணயங்களில் முதலீட்டுத் தேவை 17 சதவீதம் உயர்ந்தது. இது நிதி ஸ்திரத்தன்மை, நாணய அபாயங்கள் குறித்த முதலீட்டாளர் கவலையைப் பிரதிபலிக்கிறது.

இந்தியாவில் தங்கத் தேவை கலாச்சாரக் காரணிகளால் வலுவான ஆதரவைப் பெறுகிறது. ஏனெனில் பன்முகப்படுத்தப்பட்ட முதலீட்டுத் தொகுப்புகளில் தங்கம் இன்னும் ஆழமாக வேரூன்றும் என டைட் குறிப்பிட்டார். அமெரிக்கப் பொருளாதார வளர்ச்சி வேகமெடுக்க வேண்டும், பணவீக்கம் குறைய வேண்டும் அதே போல அரசின் கடன் குறைய வேண்டும். இது நடந்தால் தங்கம் விலை குறையும் என கூறியுள்ள அவர் இத்தகைய விளைவின் நிகழ்தகவு "மிகவும் குறைவு" என்றார்.

இந்தியாவில் கடந்த ஆண்டு அக்டோபர் முதல் இந்த ஆண்டு ஜனவரி வரை தங்கம் விலை மிக வேகமாக உயர்ந்தது. கடந்த டிசம்பரில் ஒரு சவரன் ஆபரண தங்கம் 1 லட்சம் என்ற மைல்கல்லையும் இந்த ஜனவரியில் 1.33 லட்சம் என்ற மைல்கல்லையும் கடந்தன. தற்போது தங்கம் விலை திருத்தத்தில் உள்ளது.