துபாயில் இருந்து இந்தியாவிற்கு எவ்வளவு தங்கத்தை கொண்டு வரலாம்? இதுதான் ரூல்ஸ்!

தங்கத்திற்கு உலகெங்கிலும் தனி மவுசு இருக்கத்தான் செய்கிறது. சமீபத்தில் கண்டன நடிகை ரன்யா ராவ் தங்கக் கடத்தலில் ஈடுபட்டதாக குற்றச்சாட்டுகள் எழுந்தது. அதுவும் துபாயிலிருந்து அவர் இந்தியாவிற்கு வரும்போது பிடிபட்டார். இதனால் துபாய் மற்றும் இந்தியாவில் தங்க விலையின் வித்தியாசம் என்ன? என்பது குறித்து தெரிந்து கொள்ள மக்கள் மத்தியில் ஆர்வம் அதிகரித்துள்ளது. துபாயில் தங்கம் விலை இந்தியாவை விடக் குறைவு. இந்த விலை வேறுபாடுகளுக்கு என்ன காரணம்? துபாயிலிருந்து இந்தியா வரும் ஒருவர் எவ்வளவு தங்கத்தை எடுத்து வரலாம்? என்ற விவரங்கள் குறித்து இந்தப் பதிவில் பார்ப்போம்.

துபாயில் எந்த ஒரு வரியும் இல்லாமல் தங்கம் வாங்க முடியும். வரி இல்லாத காரணத்தினால், துபாய் தங்க வர்த்தக மையமாக திகழ்ந்து வருகிறது. இங்கு வர்த்தகர்கள் சந்தை விலையில் தங்கத்தை வாங்கிக் கொள்ளலாம். துபாயில் உள்ள வாடிக்கையாளர்களுக்கு பல விற்பனையாளர்கள் போட்டி விலையில் தங்க விற்பனை செய்கின்றனர். அது மட்டுமின்றி துபாய் தங்கத்திற்கு இறக்குமதி வரியும் வசூலிப்பதில்லை.

இதற்கு அப்படியே நேர்மாறாக, இந்தியா இறக்குமதி செய்யப்படும் தங்கத்திற்கு 6 சதவீதம் வரி விதிக்கிறது. இந்தியாவிற்குள் தங்கத்தை கொண்டு வருவதற்கு வரம்புகள் உள்ளன. பொதுவாக இறக்குமதி வரி என்பது ஒரு நாட்டிற்குள் பிற நாட்டின் பொருட்களை கொண்டு வருவதற்கு அரசாங்கம் விதிக்கும் தொகை ஆகும்.

தங்கத்தை வெளிநாட்டிலிருந்து இறக்குமதி செய்யும்போது இறக்குமதி வரி விதிக்கப்படுகிறது. உதாரணமாக 1 கிராம் தங்கத்தின் உற்பத்தி விலை ஒரு குறிப்பிட்ட தொகையாக இருக்கும். அந்த தங்கத்தை இன்னொரு நாடு இறக்குமதி செய்யும் போது அதற்கு குறிப்பிட்ட தொகை வரி விதிக்கப்படும். இதனால் உள்நாட்டில் தங்க விலை அதிகரிக்கலாம்.

மார்ச் 11-ஆம் தேதி நிலவரப்படி துபாயில் 1 கிராம் 24 கேரட் தங்கம் 8,293 ரூபாயாக உள்ளது. ஆனால் இந்தியாவில் 1 கிராம் 24 கேரட் தங்கம் 8,749 ரூபாயாக உள்ளது

துபாயில் இருந்து ஒருவர் எவ்வளவு தங்கத்தை கொண்டு வர முடியும்?: பெண் ஒருவர் ஒரு லட்சம் மதிப்பிலான வரம்பிற்குள் தங்கத்தை கொண்டு வர முடியும். அதேசமயம் ஆணாக இருந்தால் 50,000 வரையிலான தங்கத்தை வரியின்றி கொண்டு வரலாம். அதுவே தங்கத்தின் அளவு அரசாங்கம் நிர்ணயித்த வரம்பை மீறினால் எடுத்து வரும் தங்கத்தின் அளவிற்கேற்ப கூடுதல் வரி விதிக்கப்படும்.