டிசம்பர் மாதம் தங்கம் விலை எப்படி இருக்கும்? நிபுணர்களின் கணிப்பால் அதிர்ச்சியில் முதலீட்டாளர்கள்.!

சர்வதேச பொருளாதாரச் சூழலில், தங்கத்தின் விலை நிலவரம் ஒரு புதிரான கட்டத்தில் உள்ளது. வரும் டிசம்பர் மாதத்தில் தங்கத்தின் விலையில் பெரிய ஏற்ற இறக்கங்கள் இருக்கலாம் என்று எதிர்பார்க்கப்படுகிறது. இதற்கு காரணம், அமெரிக்க நாட்டின் மத்திய வங்கியான ஃபெடரல் ரிசர்வ் (U.S Federal Reserve), அந்நாட்டின் பொருளாதாரத்தை கட்டுப்படுத்த வட்டி விகிதங்களை குறைக்குமா அல்லது அப்படியே நீடிக்குமா என்ற முக்கியமான முடிவை அறிவிக்க உள்ளது.

இந்த முடிவுதான், தங்கத்தின் விலைப் போக்கைத் தீர்மானிக்கும் முக்கிய சக்தியாக இருக்கும். வட்டி விகிதங்கள் குறையும் என்ற எதிர்பார்ப்பில், முதலீட்டாளர்கள் தற்போது தங்கத்தை ஒரு பாதுகாப்பான முதலீடாக கருதி அதன் மீது அதிக ஆர்வம் காட்ட தொடங்கியுள்ளனர்.

திடீர் விலை ஏற்றம் ஏன்..?: சந்தையில் நிலவும் இந்த நிச்சயமற்ற தன்மை காரணமாக, முதலீட்டாளர்கள் அதிகப் பாதுகாப்பான முதலீடுகளை தேடிச் செல்வதால், நேற்றைய தினம் தங்கத்தின் விலை ஒரே நாளில் ஒரு சதவீதத்திற்கும் அதிகமாக உயர்ந்தது.

ஸ்பாட் கோல்டின் விலை 1.1% உயர்ந்து, ஒரு அவுன்ஸ் 4,112.50 அமெரிக்க டாலர் என்ற அளவில் இருந்தது. இதேபோல், டிசம்பர் டெலிவரிக்கான அமெரிக்க தங்கத்தின் ஃபியூச்சர் விலையும் இதே அளவில் இருந்தது. இது முதலீட்டாளர்கள் மத்தியில் தங்கம் குறித்த அச்சம் நீங்கி, நம்பிக்கை திரும்பி வருவதை காட்டுகிறது.

ஃபெடரல் வங்கியின் முடிவு : முதலீட்டாளர்கள் தற்போது இரண்டு முக்கிய தரவுகளை ஆவலுடன் எதிர்பார்த்து வருகின்றனர். அக்டோபர் மாதத்தில் நடைபெற்ற ஃபெடரல் ரிசர்வ் கூட்டத்தில் எடுக்கப்பட்ட முடிவுகள் குறித்த நடவடிக்கை குறிப்புகள் இன்று வெளியாக உள்ளன. இது, பணவீக்கம் மற்றும் வேலைவாய்ப்பு நிலைகள் குறித்து வங்கியின் அதிகாரிகள் எந்த மாதிரியான சிந்தனையில் உள்ளனர் என்பதை தெளிவுபடுத்தும்.

அதேபோல், செப்டம்பர் மாதத்தின் வேலைவாய்ப்பு அறிக்கையும் வெளியாக உள்ளது. இந்த அறிக்கை, வேலைவாய்ப்பு சந்தை பலவீனமாக இருந்தால், அது பொருளாதாரத்தை காக்க வட்டி விகிதங்களை குறைக்க ஃபெடரல் வங்கியைத் தூண்டலாம். பொருளாதார வல்லுநர்கள், செப்டம்பரில் 50,000 புதிய வேலைகள் மட்டுமே சேர்க்கப்பட்டிருக்கும் என்று எதிர்பார்க்கின்றனர்.

விலை உயர்வும் சரிவும் எப்படி அமையும்..?: வட்டி ஈட்டாத ஒரு சொத்தான தங்கம், வட்டி விகிதங்கள் குறைவாக இருக்கும் போதும், பொருளாதாரத்தில் அதிக நிச்சயமற்ற தன்மை நிலவும் போதும் சிறப்பான செயல்பாட்டை காட்டும்.

விலை உயர்வுக்கு வாய்ப்பு : அமெரிக்காவின் புதிய பொருளாதார தரவுகள், வட்டி விகிதங்களைக் குறைக்க ஆதரவாக இருந்தால், தங்கத்தின் விலை மேலும் அதிகரித்து, ஒரு அவுன்ஸ் 4,130 டாலர் மற்றும் 4,200 டாலர் என்ற அடுத்தடுத்த உச்சங்களைத் தொட வாய்ப்புள்ளது.

விலை சரிவு : ஆனால், ஃபெடரல் அதிகாரிகள் வட்டி விகிதங்களைக் குறைக்கும் திட்டத்தில் இல்லை என்று கடுமையான கருத்துகளை வெளியிட்டாலோ அல்லது வேலைவாய்ப்புத் தரவுகள் மிகவும் வலுவாக இருந்தாலோ, முதலீட்டாளர்கள் வட்டி விகிதக் குறைப்பு குறித்த தங்கள் எதிர்பார்ப்புகளை குறைத்துக் கொள்வார்கள். இதனால், தங்கத்தின் விலை மீண்டும் 4,000 டாலர் என்ற முக்கியமான உளவியல் ஆதரவு மட்டத்திற்குக் கீழே சரியக்கூடும்.

தற்போது, அடுத்த மாதம் வட்டி விகிதங்கள் குறைக்கப்படும் என்ற சந்தை எதிர்பார்ப்பு, கடந்த வாரம் 63% ஆக இருந்த நிலையில் இருந்து, இப்போது 46% க்கும் சற்று அதிகமாக குறைந்துள்ளது. எனவே, தங்கத்தின் விலைப் போக்கை தீர்மானிப்பதில், வேலைவாய்ப்புச் சந்தையின் நிலை மற்றும் ஃபெடரல் வங்கியின் வார்த்தைகள் ஆகிய இரண்டும் முக்கிய பங்காற்றும். வெள்ளி, பிளாட்டினம் மற்றும் பல்லேடியம் போன்ற மற்ற விலையுயர்ந்த உலோகங்களும் இந்த சூழலில் விலை உயர்வை சந்தித்துள்ளன.