பெண்கள்: மக்கள் தொகையில் 48% ஆனா, GDP-யில் வெறும் 18%.. ஏன் இந்த நிலை..?

இந்தியாவில் பெண்கள் மொத்த மக்கள் தொகையில் 48% இருந்தாலும், மொத்த உள்நாட்டு உற்பத்தி-யில் (GDP) அவர்களின் பங்கு 18% மட்டுமே என்று தேசியக் குடும்பக் கணக்கெடுப்பு ஆய்வு (National Family Health Survey) தெரிவிக்கிறது.

பெண்களின் வேலைவாய்ப்பில் நிலவும் பாலின வேறுபாட்டைக் குறைப்பதன் மூலம், நாட்டின் மொத்த உள்நாட்டு உற்பத்தி-யில் பெண்களின் பங்கீட்டை 30% வரை உயர்த்த முடியும் என்று இந்த ஆய்வு குறிப்பிடுகிறது.

மெக்கின்சி குளோபல் இன்ஸ்டிடியூட் (MGI) நடத்திய மற்றொரு ஆய்வின்படி, உலகளவில் வேலைவாய்ப்பு, அதிகாரம் என அனைத்திலும் ஆண்கள் - பெண்கள் சமத்துவத்தை மேம்படுத்துவதன் மூலம் உலகளாவிய மொத்த உள்நாட்டு உற்பத்தி-யில் சுமார் 28 டிரில்லியன் டாலர்கள் கூடுதலாக அதிகரிக்க முடியும் என கூறியுள்ளது.

இந்தியாவைப் பொறுத்தவரை, ஆண்கள் - பெண்கள் சமத்துவத்தை மேம்படுத்தினால் 2025ஆம் ஆண்டுக்குள், ஆண்டு வருமானமாக 770 பில்லியன் டாலர் அதிகரிக்கும் என கணக்கிடப்பட்டு உள்ளது. இது தற்போதைய வர்த்தக வருமானத்தைக் காட்டிலும் 18% அதிகமாகும்

2023 ஆம் ஆண்டில், வேலை செய்யக்கூடிய மக்கள் தொகையில் கிட்டத்தட்ட 53% பெண்கள் உள்ளனர். உலக அளவில் மூன்றாவது பெரிய ஸ்டார்ட்-அப் எகோசிஸ்டத்தை கொண்டிருக்கும் இந்தியாவில் வெறும் 10% ஸ்டார்ட்-அப்களில் மட்டுமே பெண் நிறுவனர்கள் தலைமை தாங்குகின்றனர்.

பாலின சமத்துவம் மற்றும் சமூக-பொருளாதார முன்னேற்றம் ஆகியவற்றுக்கு இடையேயான தொடர்பின் முக்கியத்துவத்தை மேம்படுத்தும் பல ஆய்வுகள், "Empower Her" என்ற தலைப்பில் வெளியிடப்பட்ட காபி டேபிள் புத்தக வெளியீட்டு விழாவின் போது கவனத்தைப் பெற்றது.

உலகளவில், 65% பெண்கள் சமூக-கலாச்சார தடைகள் காரணமாக முறையான வங்கி சேவையை அணுகுவதில் கடுமையான சவால்களை எதிர்கொள்கின்றனர். இது ஆண்களுடன் ஒப்பிடும்போது மிகவும் அதிகம் என்று சர்வதேச நாணய நிதியத்தின் அறிக்கை கூறுகிறது. மறுபுறம், உலகளவில் 72% ஆண்கள் வங்கி மற்றும் நிதி நிறுவனத்தில் கணக்கு வைத்திருப்பதாக இந்த ஆய்வு கூறுகிறது.

சர்வதேச தொழிலாளர் அமைப்பின் மற்றொரு அறிக்கையின்படி, தொழில்துறைகளில் பணிபுரியும் 88% பெண்கள் முறைசாரா துறையில் பணியாற்றி வருகின்றனர். கூடுதலாக, சேவைத் துறையில் பணிபுரியும் பெண்களில் 7% முறைசாரா பணியாளர்களை சேர்ந்தவர்கள் என புள்ளிவிவரம் கூறுகிறது.