ஈச்சர் கம்பெனி உருவாக்குனா எதுனா குறை சொல்ல முடியுமா!! ஒருமுறை சார்ஜ் பண்ணா 320கிமீ-க்கு நிற்காது!

இந்தியாவின் எலெக்ட்ரிக் போக்குவரத்துத் துறையில் ஒரு குறிப்பிடத்தக்க முன்னேற்றமாக, விஇ கமர்ஷியல் வைகல்ஸ் லிமிடெட் (VE Commercial Vehicles Ltd. (VECV)) நிறுவனத்தின் வணிகப் பிரிவான ஈச்சர் லாரிகள் & பேருந்துகள் (Eicher Trucks & Buses), லீஃப்பஸ் (LeafyBus) நிறுவனத்துடன் இணைந்துள்ளது. நீண்டதூர பயணங்களுக்கான எலெக்ட்ரிக் பேருந்து சேவைகளை வழங்கும் முன்னணி நிறுவனமான லீஃப்பஸ், நாட்டின் முக்கிய வழித்தடங்களில் 13.5 மீட்டர் நீளம் கொண்ட ஈச்சர் இவி இன்டர்சிட்டி ஸ்லீப்பர் (Sleeper) பேருந்துகளை இயக்கவுள்ளது.

இந்தத் திட்டத்தின் முதற்கட்டமாக, வட இந்தியாவில் உள்ள நகரங்களுக்கு இடையே 35 பேருந்துகள் இயக்கப்படவுள்ளன. டெல்லி-டேராடூன், டெல்லி-லக்னோ போன்ற அதிக தேவை கொண்ட நகரங்களுக்கு இடையிலான வழித்தடங்களில் லீஃப்பஸ் தனது சேவைகளை விரிவுபடுத்தும் ஒரு பகுதியாக இந்த பேருந்துகள் அறிமுகப்படுத்தப்படுகின்றன. நீண்டதூர நகரங்களுக்கு இடையிலான பயணங்களுக்காகவே பிரத்யேகமாக வடிவமைக்கப்பட்ட ஈச்சர் 13.5மீ எலெக்ட்ரிக் ஸ்லீப்பர் பேருந்து, செயல்திறன், வசதி, பாதுகாப்பு மற்றும் எரிபொருள் திறன் ஆகியவற்றை ஒருங்கிணைந்ததாக உருவாக்கப்படுகிறது.

இந்த பேருந்தில் டிரைவரை சேர்க்காமல், 36 பயணிகளுக்கான படுக்கைகள் உள்ளன. இது 2×1 மேல் மற்றும் கீழ் படுக்கை அமைப்பைக் கொண்டு, இரவு நேர பயணங்களுக்கு சிறந்த பயண சவுகரியத்தை அளிக்கும். 400 kWh லித்தியம் இரும்பு பாஸ்பேட் (LFP) பேட்டரி மற்றும் 235 kW நிரந்தர காந்த மோட்டார் மூலம் இயங்கும் இந்த எலெக்ட்ரிக் பேருந்து, ஒருமுறை முழுமையாக சார்ஜ் செய்தால் 320-330 கி.மீ. பயண ரேஞ்சை வழங்குகிறது.

இது நீண்ட தூர நெடுஞ்சாலைப் பயணங்களுக்கு மிகவும் பொருத்தமானது. சார்ஜரைப் பொறுத்து, 1.5 முதல் 2 மணி நேரத்தில் ஃபாஸ்ட் சார்ஜிங் (Fast Charging) வசதியை இந்த பேருந்து ஆதரிக்கிறது, இது எலெக்ட்ரிக் பேருந்துகளின் பயன்பாட்டை அதிகரிக்கிறது. முன் மற்றும் பின்பக்க ஏர் சஸ்பென்ஷன், டிஸ்க் பிரேக்குகள் மற்றும் மேம்பட்ட ஆற்றல்-திறன் அமைப்புகள் உள்ளிட்ட பாதுகாப்பு மற்றும் ஆற்றல் திறன் ஆகியவற்றை மனதில் கொண்டு இந்த வாகனம் வடிவமைக்கப்பட்டுள்ளது.

பயணிகளுக்கான படுக்கை பெட்டிகள் 6 கன மீட்டர் சுற்றளவில் USB சார்ஜிங் போர்ட்கள் உடன் உள்ளன. மேலும், மூத்த குடிமக்கள் மற்றும் மாற்றுத்திறனாளி பயணிகளுக்காக பேருந்தின் முன்பக்கத்தில் ஒரு இருக்கை படுக்கை வசதி உள்ளது. ஆன்-போர்டு கேமரா அமைப்பு, மேம்பட்ட டெலிமேடிக்ஸ் மற்றும் ஹில் அசிஸ்ட் மூலம் பேருந்தின் பாதுகாப்பு மற்றும் டிஜிட்டல் நுண்ணறிவு மேலும் மேம்படுத்தப்பட்டுள்ளது.

இது சாய்வான நிலப்பரப்புகளிலும் நம்பிக்கையான செயல்திறனையும், பல்வேறு நிலப்பரப்புகளில் மேம்பட்ட ஓட்டுநர் ஆதரவையும் உறுதி செய்கிறது. லீஃப்பஸ் நிறுவனம் தனது பேருந்துகளை 'எனெட்ரா இவி பிரைவேட் லிமிடெட்' (Enetra EV Private Limited) மூலம் குத்தகைக்கு பெற்று வருகிறது. இது நீண்டதூர எலெக்ட்ரிக் பேருந்து பயன்பாட்டிற்கான பேருந்துகளில் கவனம் செலுத்தும் ஒரு முன்னணி குத்தகை நிறுவனமாகும்.

Images Source: Volvo Eicher Commercial Vehicles Official Press Release

லீஃப்பஸ் தற்போது டெல்லி-டேராடூன் வழித்தடத்தில் தினசரி எலெக்ட்ரிக் இண்டர்-சிட்டி பேருந்து சேவைகளை வழங்கி வருவதுடன், நாடு தழுவிய அளவில் வேகமாக விரிவடைந்து வருகிறது. எனெட்ரா இவி நிறுவனத்தில் இருந்து பெறப்பட்ட 41 இலட்சம் அமெரிக்க டாலர் நிதி, லீஃப்பஸ் நிறுவனத்தின் பேருந்து சேவைகளின் விரிவாக்கம், சார்ஜிங் உள்கட்டமைப்பு மற்றும் புதிய வழித்தட மேம்பாட்டுக்கு பயன்படுத்தப்படுகிறது.

டிரைவ்ஸ்பார்க் கருத்து: எனெட்ரா இவி நிறுவனம் ஒவ்வொரு மாதமும் குறைந்தது ஒரு புதிய இன்டர்சிட்டி எலெக்ட்ரிக் பேருந்து வழித்தடத்தை அறிமுகப்படுத்த திட்டமிட்டுள்ளது. இதற்கு பெரும்பாலும் ஈச்சர் நிறுவனத்தின் எலெக்ட்ரிக் பேருந்துகள் தான் பயன்படுத்தப்பட உள்ளன. இந்தப் புதிய எலெக்ட்ரிக் பேருந்துகள் இந்தியாவின் பொதுப் போக்குவரத்தில் பசுமையான மாற்றத்தை ஏற்படுத்தும் என்று எதிர்பார்க்கிறோம்.

Credit: Drivespark