தங்க நகை Vs டிஜிட்டல் தங்கம்:இந்த தீபாவளிக்கு எது வாங்குவது பெஸ்ட்?

தீபாவளி பண்டிகை காலத்தில் தங்கம் வாங்குவது பாரம்பரியமாகவே மங்களகரமானதாகக் கருதப்படுகிறது. ஆனால் இந்த ஆண்டு தங்கம் விலை வரலாறு காணாத ஏற்றத்தைக் கண்டுள்ளது. தங்கத்தின் விலை தொடர்ந்து எட்டாவது வாரமாக அதிகரித்து வருகிறது. இன்றைய நிலவரப்படி, 24 காரட் தங்கத்தின் 1 கிராம் விலை ரூ. 12, 546 என்ற நிலையை எட்டி விட்டது.

இந்தியாவில் பண்டிகைக் காலம் துவங்கிய நிலையில், தங்கம் விலை உயர்வு நுகர்வோர் மத்தியில் பெரும் பேசுபொருளாகியுள்ளது. தங்கத்தின் விலை 50%க்கும் மேல் அதிகரித்து, இந்த ஆண்டு எதிர்பாராத வளர்ச்சியை அடைந்துள்ளது. இதனால், தங்கம் வாங்கும் ஆர்வம் மக்கள் மத்தியில் சற்று குறைந்தே காணப்படுகிறது.

இந்த வாரம் மட்டும் தங்கத்தின் விலை 2.2% உயர்ந்துள்ளது. ராய்ட்டர்ஸ் தகவலின்படி, புதன்கிழமை ஒரு அவுன்ஸ் தங்கம் 4,059.05 டாலரை எட்டி புதிய சாதனை படைத்தது. 2025ஆம் ஆண்டில் தங்கம் சுமார் 52% உயர்ந்திருக்கிறது. இதற்கு வலுவான தேவை, புவிசார் அரசியல் நிச்சயமற்ற தன்மை மற்றும் பொருளாதார வளர்ச்சி குறித்த கவலைகள் போன்ற காரணிகள் முக்கியப் பங்காற்றுகின்றன.

உலகளாவிய ஸ்திரமற்ற காலங்களில் தங்கம் ஒரு பாதுகாப்பான முதலீடாகக் கருதப்படுகிறது. அமெரிக்க வட்டி விகிதக் குறைப்பு குறித்த எதிர்பார்ப்புகள் மற்றும் வர்த்தக வரி தொடர்பான கவலைகள் ஆகியவை முதலீட்டாளர்களைத் தங்கத்தின் பக்கம் ஈர்க்கின்றன.

இந்தச் சூழ்நிலையில், தங்கம் வாங்கத் திட்டமிடுபவர்கள் தங்கள் தேவை, பட்ஜெட் மற்றும் முதலீட்டு இலக்குகளுக்கு ஏற்ப டிஜிட்டல் தங்கம் அல்லது தங்கம் நகை / நாணயம் இரண்டில் ஒன்றைத் தேர்வு செய்யலாம். இரண்டுக்கும் தனித்தன்மை வாய்ந்த நன்மைகள் உள்ளன. தங்க நகை கையில் தொட்டு பார்த்து வாங்க கூடியது, நம் வசம் இருக்க கூடிய சொத்து, விழா நோக்கங்களுக்காக இது அதிகம் விரும்பப்படுகிறது. அதே வேளையில் டிஜிட்டல் தங்கம் எளிமையாக வாங்க கூடியது அதனை நாம் பாதுகாக்க வேண்டிய அவசியமில்லை.

டிஜிட்டல் தங்கம் என்பது ஆன்லைனில் தங்கம் வாங்க, விற்க, சேமிக்க உதவும் ஒரு வசதியாகும். இதை ரூ. 100 போன்ற மிகக் குறைந்த தொகைக்கு வாங்கலாம். சேவை வழங்குநரால் தங்கம் பாதுகாப்பாக சேமிக்கப்படும். பல நகைக்கடை நிறுவனங்களும் முதலீட்டு தளங்களும் இந்த வசதியை வழங்குகின்றன. இது எளிதான பணப்புழக்கத்தை வழங்குகிறது. எந்த நேரத்திலும் விற்கலாம். பாதுகாப்பு குறித்த கவலைகள் தேவையில்லை. திருட்டு, பராமரிப்புச் செலவு போன்ற கவலைகளில் இருந்து இது நுகர்வோருக்கு மன அமைதியைத் தருகிறது.

இத்திட்டத்தில், வாங்குபவருக்கு 24 கேரட் சுத்தமான தங்கம், நிகழ்நேர விலையில் வழங்கப்படுகிறது. குறுகிய கால மற்றும் நீண்ட கால முதலீட்டு இலக்குகளுக்கு இது ஏற்றது. இதுவும் வரிக்கு உட்பட்டது. 12 மாத கால வைத்திருப்பு காலம் உண்டு. 12 மாதங்களுக்குள் விற்கப்படும் டிஜிட்டல் தங்கம், குறுகிய கால மூலதன ஆதாயமாகக் கருதப்பட்டு, வருமான வரி விகிதங்களுக்கு உட்பட்டது.

12 மாதங்கள் அல்லது அதற்கு மேல் வைத்திருக்கப்படும் டிஜிட்டல் தங்கத்தின் ஆதாயங்களுக்கு 12.5% வரி விதிக்கப்படுகிறது. மொபைல் வாலெட்டுகள், வங்கி செயலிகள், நகைக்கடை இணையதளங்கள் போன்ற பல வழிகளில் டிஜிட்டல் தங்கம் வாங்கலாம். கோல்ட் இ.டி.எஃப் (ETF) மூலமும் டிஜிட்டல் தங்கத்தில் முதலீடு செய்வது பிரபலமடைந்து வருகிறது. தங்க நகை போலவே, டிஜிட்டல் தங்கத்தையும் வாங்கும்போது 3% ஜி.எஸ்.டி (GST) வரி செலுத்த வேண்டும்.

பிசிக்கல் கோல்டு எனப்படும் தங்கம் பாரம்பரியமான, கையில் பிடித்துணரக்கூடிய முதலீட்டு வடிவம். தங்க நாணயங்கள், கட்டிகள், நகைகள் ஆகியவை இதில் அடங்கும். திருமணங்கள் போன்ற தனிப்பட்ட மற்றும் சடங்கு நோக்கங்களுக்கு இது பரவலாகப் பயன்படுத்தப்படுகிறது.

இந்த தங்கத்தை வீட்டிலோ அல்லது வங்கி லாக்கர்களிலோ சேமிக்கலாம். இது உணர்வுபூர்வமான, கலாச்சார மதிப்பைக் கொண்டுள்ளது. இதனை வாங்கும்போது 3% ஜி.எஸ்.டி விதிக்கப்படுகிறது. நகை வாங்கும்போது, செய் கூலியாக 10% முதல் 20% வரை கட்டணங்கள் செலுத்த வேண்டியிருக்கும். இந்த கூடுதல் செலவுகள் டிஜிட்டல் தங்கத்தை விட இந்த தங்கத்தை அதிக விலைக்கு மாற்றுகின்றன. இதனால், தங்க நகைகள் வாங்கும்போது, தங்கத்தின் மதிப்பை விட அதிகத் தொகையைச் செலுத்துகிறோம். எனவே, குறுகிய கால முதலீட்டிற்கு இது சிறந்த வழி அல்ல.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.