10 ஆண்டுகளுக்கு முன் ரூ.8 லட்சத்திற்கு வாங்கிய தங்கத்தின் இப்போதைய மதிப்பு என்ன?

பணம் சேமிப்பதிலும், அதனை தங்கத்தில் முதலீடு செய்வதிலும் இந்திய குடும்ப தலைவிகளை அடித்து கொள்ள முடியாது. நகை சீட்டு போட்டுவதில் தொடங்கி ஒரு போனஸ் தொகை வந்துவிட்டால் கூட அந்த பணத்திற்கு தங்கம் வாங்குவது என பெண்கள் பல ஆண்டுகளாக தங்கத்தை தான் நம்புகிறார்கள்.

இந்திய பெண்களுக்கும் தங்கத்துக்கும் இடையிலான பிணைப்பு மிக வலுவானது. அந்த வகையில் பத்து ஆண்டுகளுக்கு முன்னர் தன்னுடைய மனைவி தங்கத்தில் செய்த முதலீடும் அதே தொகையில் தான் வாங்கிய காரின் மதிப்பும் தற்போது என்னவாக மாறியிருக்கிறது என்பது குறித்து பிரபல நிதி ஆலோசகரான ஏ கே மந்தன் வெளியிட்டு இருக்கக்கூடிய பதிவு சமூக வலைத்தளங்களில் டிரெண்டாகி வருகிறது.

2025 ஆம் ஆண்டில் தங்கம் பெரிய வளர்ச்சியை பெற்றது. வரலாறு காணாத உச்சங்களை எல்லாம் தங்கம் விலை தொட்டது . தங்கத்தில் முதலீடு செய்தவர்களுக்கு மிகச்சிறந்த ஒரு ஆண்டாக 2025 அமைந்தது . தங்கத்தில் செய்யப்படும் முதலீடு எப்போதுமே நம்மை மோசம் போக செய்யாது என்பதற்கு உதாரணமாக ஏ கே மந்தனின் பதிவு அமைந்திருக்கிறது.

தன்னுடைய எக்ஸ் பக்கத்தில் பதிவு வெளியிட்டிருக்கும் அவர் பத்து ஆண்டுகளுக்கு முன்னர் நான் 8 லட்சம் ரூபாய் கொடுத்து ஒரு கார் வாங்கினேன், என்னுடைய மனைவி அதே 8 லட்சம் ரூபாய்க்கு தங்கம் வாங்கினார். இன்று அந்த காரின் மதிப்பு 1.5 லட்சம் ரூபாய் , ஆனால் அவர் வாங்கிய தங்கத்தின் மதிப்பு 32 லட்சம் என கூறி இருக்கிறார்.

மேலும் தங்கத்தை வாங்க வேண்டாம் அந்த பணத்தில் நாம் எங்கேயாவது சுற்றுலா சென்று வரலாம் என நான் கூறினேன், அதற்கு என்னுடைய மனைவி சுற்றுலா 5 நாட்களுக்கு தான் நீடிக்கும் ஆனால் தங்கம் ஐந்து தலைமுறைகளுக்கு நீடிக்கும் எனக் கூறினார் . நான் ஒரு லட்சம் ரூபாய்க்கு போன் வாங்கினேன் அவர் ஒரு லட்சம் ரூபாய்க்கு தங்கம் வாங்கினார் தற்போது அந்த போனின் மதிப்பு 8,000 ரூபாய் தான் அவர் வாங்கிய தங்கத்தின் மதிப்பு 2 லட்சம் ரூபாய் என கூறி இருக்கிறார். மனைவிகள் எப்போதுமே புத்திசாலிகள் என பதிவு செய்திருக்கிறார்.

எக்ஸ் பக்கத்தில் இவருடைய பதிவு ஆயிரக்கணக்கானவர்களின் பார்வைகளையும் நூற்றுக்கணக்கானவர்களின் கமெண்டுகளையும் பெற்றிருக்கிறது . பலரும் இந்திய பெண்களின் முதலீட்டு முடிவுகளை பாராட்டியுள்ளனர். சிலர் வாழ்க்கை சில விஷயங்கள் அனுபவிக்கவும் வேண்டும் எப்போதுமே சேமிப்பு சேமிப்பு என ஓடி கொண்டிருக்க கூடாது என கூறியுள்ளனர். ஒரு பயனர் தங்கத்தில் முதலீடு செய்தால் நல்ல லாபம் கிடைக்கும் என்பது உண்மைதான் ஆனால் அந்த ஐந்து நாட்கள் சுற்றுலாவும் உங்களுடைய காரும் உங்கள் வாழ்நாளில் மறக்க முடியாத நினைவுகளையும் அனுபவங்களையும் தந்திருக்கும் என கூறியுள்ளார்.

Disclaimer: இந்த செய்தியில் இருக்கும் கருத்துகள் மற்றும் பரிந்துரைகள் தனிப்பட்ட ஆய்வாளர்கள் அல்லது நிறுவனங்களின் சொந்த கருத்துகளாகும், இவை Goodreturns.in அல்லது Greynium Information Technologies Private Limited (இவை இரண்டும் "நாங்கள்" என குறிப்பிடப்படுகிறது) ஆகியவற்றின் கருத்துகளைப் பிரதிபலிக்கவில்லை. உள்ளடக்கத்தின் துல்லியம், முழுமை அல்லது நம்பகத்தன்மைக்கு நாங்கள் எந்தவொரு உத்தரவாதம் அளிக்கவோ, அங்கீகரிக்கவோ அல்லது பொறுப்பேற்கவோ மாட்டோம். மேலும், முதலீட்டு ஆலோசனை அல்லது பங்குகளை வாங்கவோ விற்கவோ எந்த வித தூண்டுதலையும், ஊக்கத்தையும் நாங்கள் வழங்கவில்லை. அனைத்து தகவல்களும் புரிதல் நோக்கங்களுக்காக மட்டுமே வழங்கப்படுகின்றன. எந்தவொரு முதலீட்டு முடிவுகளை எடுப்பதற்கு முன்பும், அங்கீகரிக்கப்பட்ட நிதி ஆலோசகர்களிடமிருந்து தனிப்பட்ட முறையில் சரிபார்க்கப்பட வேண்டும்.