பங்குச்சந்தை முதலீட்டை விட அதிக லாபம் கொடுத்த தங்கம்.. வேற லெவல் விஷயமாச்சே..!

உலகளவில் தங்கம் வாங்க வேண்டுமென ஒரு பிரச்சாரம் தீவிரமாகக் கடந்த சில வருடங்களாக மேற்கொள்ளப்பட்டது பலருக்கும் நினைவிருக்கும். ஆனால் இந்த வருடம் சர்வதேச வர்த்தகச் சூழ்நிலை காரணமாகத் தங்கம் தான் அதிகப்படியான லாபத்தைக் கொடுத்த முதலீடாக இருந்துள்ளது.

2023 ஆம் ஆண்டில் மட்டும் தங்கம் மீதான முதலீட்டுக்கு சுமார் 13% க்கும் அதிகமான வருமானம் கிடைத்துள்ளது. கடந்த 10 ஆண்டுகளில் இல்லாத அளவுக்குத் தங்கம் விலை உயர்வில்லை என்றாலும் பங்குச்சந்தை, மியூச்சவல் பண்ட், அரசு பத்திரம் ஆகியவற்றுக்கு இணையாக லாபத்தைத் தங்கம் கொடுத்துள்ளது.

2020 ஆம் ஆண்டில் கோவிட் தொற்று காலத்தின் போது தங்கம் விலை 28.23% என்ற அளவில் உயர்ந்து முதலீட்டாளர்களுக்குச் சிறந்த வருமானத்தைக் கொடுத்தது. இதன் மூலம் தங்கம் நிச்சயமற்ற பொருளாதாரக் காலங்களில் ஏன் சிறந்த ஹெட்ஜிங் கருவி என்பதை மீண்டும் ஒரு முறை நிரூபணம் செய்துள்ளது.

இந்தியச் சந்தையைப் பொறுத்த வரையில் 2023 ஆம் ஆண்டில் சென்செக்ஸ் குறியீடு 16.25 சதவீதம் வளர்ச்சி அடைந்துள்ளது, நிஃப்டி 50 குறியீடு 17.32 சதவீதம் வளர்ச்சி அடைந்துள்ளது. தங்கம் விலை 56080 ரூபாயில் இருந்து 64875 ரூபாய் வரையில் உயர்ந்து 17.46 சதவீத உயர்வைப் பதிவு செய்துள்ளது.

தங்கம் விலை இந்த ஆண்டுத் துவக்கத்தில் அமெரிக்க வங்கி திவால், அடுத்தடுத்து வட்டி உயர்வு, பொருளாதாரம் சரிவு, பணவீக்கம் உயர்வு, ரெசிஷன் அச்சம் எனப் பல பிரச்சனைகள் இருந்த காரணத்தால் தங்கம் விலை முதல் 6 மாதத்தில் தடாலடியாக உயர்ந்தது. அடுத்த 6 மாதத்தில் தங்கம் விலை உயர்வான இடத்திலேயே தக்கவைத்துக்கொள்ளும் அளவுக்குச் சர்வதேச பொருளாதாரச் சூழ்நிலை இருந்தது.

இதேவேளையில் எம்சிஎக்ஸ் தங்கம் விலை மற்றும் காமெக்ஸ் விலையை ஒப்பிடும் போது, எம்சிஎக்ஸ் விலை சற்று அதிகமாகவே உயர்ந்துள்ளது. 2023ல் எம்சிஎக்ஸ் தங்கம் விலை 13.55 சதவீதம் உயர்ந்துள்ள நிலையில் காமெக்ஸ் தங்கம் விலை 11.70 சதவீதம் வரையில் உயர்ந்துள்ளது.

2023 ஆம் ஆண்டில் எம்சிஎக்ஸ் தங்கம் விலை வரலாற்று உச்ச அளவான 64,063 ரூபாய் வரையில் உயர்ந்துள்ளது குறிப்பிடத்தக்கது. 2023ல் எம்சிஎக்ஸ் தங்கம் விலை 13.55 சதவீதம் உயர்ந்தது போல் 2011ல் அதிகப்படியாக 31.84 சதவீதமும், 2010ல் 29.61 சதவீதமும் உயர்ந்துள்ளது. 2013ல் எம்சிஎக்ஸ் தங்கம் விலை 7.89 சதவீதம் சரிந்த காலமும் உள்ளது.

பங்குச்சந்தை போல் தங்கம் மீதான முதலீட்டின் மீதும் ரிஸ்க் இருந்தாலும் இதன் அளவு குறைவு. எப்போதும் உங்கள் போர்ட்போலியோவில் குறிப்பிடத்தக்க முதலீடு தங்கம், வங்கி வைப்பு நிதி போன்ற முதலீடுகள் இருப்பது அவசியம்.