ரூ.1500 வரை சரிந்த தங்கம் விலை, இன்று உயரத் துவங்கியது.. நல்ல வாய்ப்பை நழுவவிடாதீர்கள்..!

அமெரிக்கப் பெடரல் ரிசர்வ் வங்கியின் நாணய கொள்கை முடிவுகள் முதலீட்டுச் சந்தையில் பெரும் மாற்றத்தை ஏற்படுத்தி வரும் நிலையில் தங்கம் விலையில் கடந்த 2 நாட்களில் மட்டும் சுமார் 1500 ரூபாய் வரையில் குறைந்து சாமானிய மக்களுக்குத் தங்கத்தை வாங்கும் சிறப்பான வாய்ப்பை அளித்தது.

ஆனால் இன்று காலை சர்வதேச சந்தையில் தங்கம் விலை கணிசமாக உயர்ந்துள்ள நிலையிலும், ரூபாய் மதிப்பு சரிவடைந்த காரணத்தால் இந்திய ரீடைல் சந்தையில் தங்கம் விலை உயர்ந்துள்ளது.

சர்வதேச சந்தை தங்கம் விலை

இன்று காலை சர்வதேச சந்தை வர்த்தகம் துவங்கும் வேளையில் ஒரு அவுன்ஸ் தங்கம் விலை 1770 டாலரில் இருந்து 1,784 டாலர் வரையில் உயர்ந்துள்ளது. இதன் வாயிலாக 2 நாட்களாக இந்தியாவில் குறைந்து வந்த தங்கம் விலை இன்று கணிசமாக உயர்ந்துள்ளது.

எம்சிஎக்ஸ் சந்தை தங்கம் விலை

வாரத்தின் கடைசி வர்த்தக நாளான இன்று எம்சிஎக்ஸ் சந்தையில் தங்கம் விலை 0.32 சதவீதம் அதிகரித்து 10 கிராம் 24 கேரட் தங்கம் விலை 47,106 ரூபாய் அளவிற்கு அதிகரித்துள்ளது. இதன் மூலம் தங்கம் விலை தனது வரலாற்று உச்ச அளவில் இருந்து 9500 ரூபாய் குறைவாக உள்ளது.

எம்சிஎக்ஸ் சந்தை வெள்ளி விலை

இதேபோல் வெள்ளியின் விலையும் இன்று 0.84 சதவீதம் அதிகரித்து 68,167 ரூபாயாகக் குறைந்துள்ளது. நேற்றைய வர்த்தகச் சரிவில் வெள்ளி விலை தனது வலிமையான 71000 ரூபாய் அளவீடு, 70000 ரூபாய் அளவீட்டைக் கடந்து பெரிய அளவிலான சரிவைப் பதிவு செய்தது.

150 டாலர் வரையில் சரிவு

கடந்த 7 நாட்களில் தங்கம் விலை சர்வதேச சந்தையில் 1901 டாலரில் இருந்து 1771 டாலர் வரையில் குறைந்துள்ளது குறிப்பிடத்தக்கது. இந்நிலையில் வெள்ளிக்கிழமை வர்த்தகத்தில் தங்கம் விலை மீண்டும் உயர துவங்கியுள்ள காரணத்தால் வாய்ப்பை நழுவ விடாமல் தங்கம் வாங்க திட்டமிடுவோர் தங்கத்தை வாங்குவது சிறந்தது.

உள்நாட்டு முதலீட்டு சந்தை

தற்போது உள்நாட்டு பங்குச்சந்தை மற்றும் முதலீட்டு சந்தை மிகவும் மோசமாக நிலையை அடைந்து வரும் நிலையிலும், அமெரிக்கச் சந்தையில் வலிமை அடைந்துவரும் காரணத்தால் அதிகளவிலான முதலீடுகள் வெளியேறி வருகிறது. இதன் வாயிலாகவே இன்று சென்செக்ஸ் 700 புள்ளிகள் வரையில் சரிந்துள்ளது.