ஹைபிரிட் Vs எலக்ட்ரிக் கார் : இந்தியாவில் எந்த காருக்கு வரவேற்பு அதிகம்?

டெல்லி: இந்திய சந்தையில் தற்போது பல்வேறு நிறுவனங்களும் போட்டி போட்டுக் கொண்டு புது புது மாடல் கார்களை அறிமுகம் செய்து வருகின்றன. அந்த வகையில் பாரம்பரியமாக பெட்ரோல் மற்றும் டீசல் கார்களுக்கு மாற்றாக மின்சார கார்கள் , கேஸ் மற்றும் எலக்ட்ரிக் மோட்டார் ஆகிய இரண்டிலும் செயல்படக்கூடிய ஹைபிரிட் கார்களுக்கு இடையே இந்திய சந்தையில் தற்போது போட்டி அதிகரித்துள்ளது.

இந்தியாவைப் பொறுத்தவரை 2023 ஆம் ஆண்டில் பேட்டரி மூலம் இயங்கக்கூடிய மின்சார கார்களின் விற்பனை 95, 859 ஆக இருந்தது இது 2024ஆம் ஆண்டில் 1,13,441 என அதிகரித்தது. இதுவே 2023 ஆம் ஆண்டில் ஹைபிரிட் கார்களின் விற்பனை 87, 519 ஆக இருந்து 2024 ஆம் ஆண்டில் 1,03,252 என அதிகரித்துள்ளது. ஓராண்டு காலத்தில் விற்பனை அதிகரித்து இருந்தாலும் மின்சார வாகனங்களுடன் ஒப்பிடும்போது ஹைபிரிட் கார்களின் விற்பனை குறைவாக தான் இருக்கிறது.

இந்த நிலையில் 2025 ஆம் ஆண்டில் இந்திய சந்தையில் ஹைபிரிட் மற்றும் மின்சார கார்களுக்கு இடையிலான போட்டியில் மின்சார கார்களுக்கே வெற்றி கிடைக்கும் என கணிக்கப்படுகிறது. இந்தியாவின் மிகப்பெரிய கார் உற்பத்தி நிறுவனமான மாருதி சுசுகி பேட்டரி எலக்ட்ரிக் காரான e Vitaraஐ அறிமுகம் செய்ய இருக்கிறது. ஏற்கனவே ஹூண்டாய் மோட்டார் நிறுவனம் Creta எலக்ட்ரிக் காரையும், மகேந்திரா நிறுவனம் BE 6 , XEV 9e ஆகிய கார்களையும் அறிமுகம் செய்துவிட்டது.

ஜேஎஸ்டபிள்யூ எம்ஜி மோட்டார் நிறுவனம் கூடிய விரைவில் Cyberster காரை அறிமுகம் செய்ய இருக்கிறது. ஆடம்பர கார் உற்பத்தி நிறுவனங்களான மெர்சிடிஸ் பென்ஸ், பிஎம்டபிள்யூ ,ஆடி, வால்வோ ஆகிய நிறுவனங்களும் இந்திய சந்தையில் தங்களுடைய மின்சார கார்களை இந்த ஆண்டிலேயே அறிமுகம் செய்து விற்பனைக்கு கொண்டுவர திட்டமிட்டுள்ளன. இந்தியாவில் தற்போதைக்கு மின்சார கார் சந்தையில் டாடா மோட்டார்ஸ் நிறுவனத்தின் Tiago, Punch, Nexon, Curvv உள்ளிட்ட கார்கள் தான் அதிக அளவில் விற்பனையாகி வருகின்றன. நடப்பு ஆண்டில் இந்தியாவில் ஹைபிரிட் காரர்களுடன் ஒப்பிடும்போது மின்சார கார்களின் விற்பனை சற்றே அதிகரிக்கும் என கணிப்பதாக JATO டைனமிக்ஸ் என்ற அமைப்பின் இந்திய தலைவர் ரவி பாட்டியா தெரிவித்துள்ளார்.

ஹைபிரிட் பிரிவினை பொருத்தவரை மாருதி சுசுகி Grand Vitara, Invicto, டொயோட்டாவின் Urban Cruiser Hyryder, ஆகியவை இந்தியா சந்தையில் விற்பனை செய்யப்பட்டு வருகின்றன. கார் உற்பத்தி நிறுவனங்கள் தற்போது தங்களுடைய கவனத்தை பெருமளவில் மின்சார வாகனங்களின் மீதே செலுத்துகின்றன என்பதால் ஹைபிரிட் கார்கள் விற்பனை குறையும் என சொல்லப்படுகிறது.

இந்தியாவில் தற்போது மின்சார கார்களுக்கு 5% ஜிஎஸ்டி விதிக்கப்படுகிறது என்றால் ஹைபிரிட் கார்களுக்கு 28% ஜிஎஸ்டி விதிக்கப்படுகிறது. அரசு ஹைபிரிட் கார்களின் விற்பனையை ஊக்குவிக்க கூட வகையில் ஜிஎஸ்டி வரி குறைப்பு என்பன உள்ளிட்ட சலுகைகளை அறிவித்தால் தான் அதன் விற்பனை இன்னும் அதிகரிக்கும் என எதிர்பார்க்கப்படுகிறது.

Story written: Devika