அடேங்கப்பா.. ஒவ்வொரு பத்து நொடிக்கும் ஒரு ஸ்கூட்டர் விற்பனை.. அனல் பறக்கும் ஓலா

ஓலா எலக்ட்ரிக் நிறுவனம் இந்த நவராத்திரி, தசரா காலத்தில் ஒவ்வொரு பத்து நொடிக்கும் ஒரு ஸ்கூட்டரை செய்துள்ளது.

சமீபகாலமாக மின்சார வாகனங்கள் விற்பனை கொஞ்சம் கொஞ்சமாக அதிகரித்து வருகிறது. குறைந்த செலவில் பயணிக்கலாம், சுற்றுச்சூழலுக்கு மாசு ஏற்படாது என்பதால் மக்கள் மின்சார வாகனங்களை நாட தொடங்கி விட்டனர். வாகன தயாரிப்பு நிறுவனங்களும் தற்போது மின்சார வாகனங்கள் தயாரிப்புக்கு முக்கியத்துவம் அளித்து வருகின்றன. கடந்த சில ஆண்டுகளாக மின்சார வாகனங்கள் விற்பனை சிறப்பான வளர்ச்சி கண்டு வருகிறது. குறிப்பாக இரு சக்கர மின்சார வாகனங்கள் விற்பனை அதிகமாக உள்ளது. நாட்டின் முன்னணி மின்சார இருசக்கர வாகன தயாரிப்புகளில் ஒன்று ஓலா எலக்ட்ரிக் நிறுவனம்.

ஓலா எலக்ட்ரிக் நிறுவனம் S1 Pro, S1 Air, மற்றும் S1X ஆகிய மூன்று மாடல்களை விற்பனை செய்கிறது. இந்நிறுவனம் நவராத்திரி, தசரா பண்டிகை காலத்தில் விற்பனை அதிகரிக்கும் நோக்கில் Bharat EV Fest என்ற பண்டிகை விற்பனையை அறிவித்தது. கடந்த 16ம் தேதியன்று இந்த பண்டிகை கால விற்பனையை ஓலா எலக்ட்ரிக் நிறுவனம் தொடங்கியது. Bharat EV Fest-ன் கீழ், அனைத்து புதிய S1 Pro-2nd Gen ஸ்கூட்டருக்கு எந்த கூடுதல் கட்டணமும் இல்லாமல் பேட்டரிக்கு ஐந்து வருட நீட்டிக்கப்பட்ட உத்தரவாதம் வழங்குகிறது. ரூ.10 ஆயிரம் வரை எக்ஸ்சேஞ்ச் போனஸ் மற்றும் குறிப்பிட்ட கிரெடிட் கார்டுகளில், ரூ.7,500 உடனடி தள்ளுபடி போன்றவற்றையும் ஓலா எலக்ட்ரிக் வழங்குகிறது.

ஓலா எலக்ட்ரிக் நிறுவனம் ஒரு டெஸ்ட் ரெய்டு திட்டத்தையும் அறிவித்துள்ளது. இந்த திட்டத்தின்கீழ் ஒரு அதிர்ஷ்ட வாடிக்கையாளருக்கு Ola S1X+ இலவசமாக வழங்குகிறது. ஜீரோ டவுன்பேமெண்ட் போன்ற கவர்ச்சிகரமான நிதி சலுகைகளையும் ஓலா எலக்ட்ரிக் அறிவித்தது. இதன் எதிரொலியாக இந்த நவராத்திரி பண்டிகை காலத்தில் ஓலாவின் மின்சார ஸ்கூட்டர்கள் விற்பனை புதிய உச்சத்தை தொட்டுள்ளது. இந்த நவராத்திரி, தசரா காலத்தில் ஒவ்வொரு பத்து நொடிக்கும் ஒரு ஸ்கூட்டரை ஓலா எலக்ட்ரிக் நிறுவனம் செய்துள்ளது.

ஓலா எலக்ட்ரிக் நிறுவனத்தின் தலைமை செயல் அதிகாரி பவிஷ் அகர்வால் கூறுகையில், இந்த நவராத்திரி மற்றும் தசராவில் எங்கள் விற்பனை புதிய உச்சத்தை தொட்டது. நிறுவனம் இப்போது ஒவ்வொரு 10 வினாடிக்கும் ஒரு ஸ்கூட்டர் விற்பனை செய்கிறது. கடந்த ஆண்டைக் காட்டிலும் 2.5 மடங்குக்கும் அதிகமாக ஸ்கூட்டர்கள் விற்பனையானது என்று தெரிவித்தார்.