தங்கம் பவுனுக்கு 2,700 உயர்வு! உச்ச விலையை நோக்கிச் செல்லும் சுவர்ணம்!

1600 டாலர்

பொதுவாக சர்வதேச தங்கம் விலை ஏறினால், இந்தியாவிலும் தங்கத்தின் விலை அதிகரிக்கும். சர்வதேச அளவிலும் தங்கம் தன் பழைய உச்ச விலையான 1,680 டாலரைத் தொட முயற்சித்துக் கொண்டிருப்பதாகவே தெரிகிறது. நேற்று ஒரு அவுன்ஸ் சர்வதேச தங்கத்தின் விலை 1,628 டாலரைத் தொட்டு வர்த்தகமானது.

விலை ஏற்றம்

கடந்த மார்ச் 19 அன்று சர்வதேச தங்கத்தின் விலை 1,471 டாலருக்கு வர்த்தகமானது. ஆனால் கடந்த 8 நாட்களில் சர்வதேச தங்கம் விலை 1,628 டாலர் வரை அதிகரித்து இருக்கிறது. ஆக விலை ஏற்றம் கண் கூடாகத் தெரிகிறது. அனலிஸ்ட்கள் சொல்வது போல இன்னும் தங்கம் விலை ஏற வாய்ப்பு இருப்பதாகவே தெரிகிறது.

இந்தியாவில் 44,500

இந்தியாவின் எம் சி எக்ஸ் ஃப்யூச்சர்ஸ் சந்தையில் 10 கிராம் தங்கத்துக்கான ஃப்யூச்சர்ஸ் மார்ச் 26 அன்று அதிகபட்சமாக 44,535 ரூபாயைத் தொட்டது. நேற்று மார்ச் 27, 2020 அன்று அதிகபட்சமாக 43,760 ரூபாயைத் தொட்டு இருக்கிறது.

38,400 டூ 44,500

இந்தியாவின் தங்க ஃப்யூச்சர்ஸ், சுமார் 10 நாட்களுக்கு முன்பு தான் தன் குறைந்தபட்ச விலையாக 38,400 ரூபாயைத் தொட்டது. ஆனால் சில தினங்களுக்கு முன்பு மீண்டும் தன் உச்ச விலையான 44,961 ரூபாயை நோக்கி நகரும் விதத்தில் 44,535 ரூபாயைத் தொட்டு இருப்பது குறிப்பிடத்தக்கது.

சென்னை தங்கம்

சென்னையில், கடந்த மார்ச் 19, 2020 அன்று 24 கேரட் 10 கிராம் ஆபரணத் தங்கம் 41,920 ரூபாய்க்கு விற்கப்பட்டது. கடந்த எட்டு நாட்களில் அதே 24 கேரட் 10 கிராம் ஆபரணத் தங்கத்தின் விலை கணிசமாக அதிகரித்து நேற்று 45,300 ரூபாய்க்கு விற்கப்பட்டு இருக்கிறது.

பவுனுக்கு எவ்வளவு ஏற்றம்

24 கேரட் 1 கிராம் ஆபரணத் தங்கத்தின் விலை கடந்த எட்டு நாட்களில் சுமாராக 338 ரூபாய் அதிகரித்து இருக்கிறது. எனவே ஒரு பவுன் (8 கிராம்) 24 கேரட் ஆபரணத் தங்கத்தின் விலை சுமாராக 2,700 ரூபாய் அதிகரித்து இருக்கிறது. இன்னும் விலை ஏறுமா..?

தங்கம் விலை ஏறலாம் ஏன்?

அமெரிக்காவையே புரட்டி எடுத்துக் கொண்டிருக்கும் கொரோனா வைரஸ் பயம், அமெரிக்க டாலருக்கு நிகரான இந்திய ரூபாய் மதிப்பு 74 ரூபாய்க்கு மேல் இருப்பது, சர்வதேச அளவில் தங்கம் விலை அதிகரிப்பது, உலக பங்குச் சந்தைகள் இன்னும் நிலை பெறாமல் பெரிய ஏற்ற இறக்கங்களுடன் வர்த்தகமாவது, தொடர்ந்து பல நாடுகளிலும் வங்கிக் கடனுக்கான வட்டி விகிதங்களைக் குறைப்பது... போன்ற காரணங்களால் ஆபரணத் தங்கத்தின் விலை தொடர்ந்து ஏற நிறைய வாய்ப்புகள் இருக்கின்றன.