கார் விற்பனை 5.18% குறைவு.. இரு சக்கர வாகன விற்பனை 12.26% உயர்வு..

2015 ஆம் வருட ஜூன் மாதத்துடன் ஒப்பிடும் போது 2016 ஆம் வருடத்தில் கார் விற்பனை 5.18% குறைந்துள்ளது என்று இந்திய ஆட்டோமொபைல் உற்பத்தியாளர்கள் சங்கம் அறிவித்துள்ளது.

உள்நாட்டுப் பயணிகள் வாகன விற்பனை கடந்த வருட ஜூன் மாதத்தை விட 2016-இல் 2.68% உயர்ந்துள்ளது. கடந்த வருட ஜூன் மாதம் 2,17,620 உள்நாட்டுப் பயணிகள் வகனங்கள் விற்பனை செய்யப்பட்ட நிலையில் நடப்பு ஆண்டு ஜூன் மாதம் 2,23,454 உள்நாட்டுப் பயணிகள் வாகனங்களை விற்பனை செய்யப்பட்டுள்ளன.

மோட்டார் சைக்கிள் விற்பனை சென்ற வருட ஜூன் மாதத்தை ஒப்பிடும் போது 7.52 % உயர்ந்துள்ளது. கடந்த வருடம் 8,77,690 மோட்டார் சைக்கிள்கள் விற்பனை செய்யப்பட்டன, இந்த வருடம் 9,43,680 மோட்டார் சைக்கிள்கள் விற்பானை செய்யப்பட்டுள்ளன.

இரண்டு சக்கர வாகனம் விற்பனை சென்ற வருட ஜூன் மாதத்தை விட 12.26% உயர்ந்துள்ளது. கடந்த வருடம் 13,07,704 இரண்டு சக்கர வாகனங்கள் விற்பனை செய்யப்பட்ட நிலையில் இந்த வருடம் 14,68,035 இரண்டு சக்கர வாகனங்கள் விற்பானை செய்யப்பட்டுள்ளன.

கார் விற்பனை சென்ற வருட ஜூன் மாதத்தை விட 5.18% குறைந்துள்ளதாகவும், 1,62,655 கார்கள் கடந்த வருடம் விற்பனை செய்யப்பட்ட நிலையில் இந்த வருடம் 1,54,237 கார்களாக விற்பனை குறைந்துள்ளதாகவும் இந்திய ஆட்டோமொபைல் உற்பத்தியாளர்கள் சங்கம் அறிவித்துள்ளது.

மேலும், வர்த்தக வாகனங்கள் விற்பனை, கடந்த வருடம் 56,032 வாகனங்கள் விற்பனை செய்யப்பட்டதாகவும், இந்த வருடம் அதிலிருந்து 5.36% உயர்ந்துள்ளதாகவும் அறிவித்துள்ளனர்.