டிசம்பர் 2020 வேற லெவல்.. கார், பைக் விற்பனை அமோகம்..!

 

டிவிஎஸ் மாஸ்

இந்தியாவின் முன்னணி இருசக்கர வாகன தயாரிப்பு மற்றும் விற்பனை நிறுவனமான டிவிஎஸ் மோட்டார்ஸ் டிசம்பர் 2020ல் சுமார் 2,72,084 வாகனங்களை விற்பனை செய்து அசத்தியுள்ளது. கடந்த வருடம் இதே காலகட்டத்தில் இதன் எண்ணிக்கை 2,31,571 ஆக இருந்தது குறிப்பிடத்தக்கது.

இதன் மூலம் பல்வேறு பாதிப்பு நிறைந்த 2020ஆம் ஆண்டின் டிசம்பர் மாதத்தில் டிவிஎஸ் விற்பனையில் 17.5 சதவீத வளர்ச்சியை அடைந்துள்ளது.

ஹூண்டாய் கலக்கல்

இதேபோல் இந்தியாவின் முன்னணி கார் தயாரிப்பு மற்றும் விற்பனை நிறுவனமான ஹூண்டாய், டிசம்பர் மாதம் 2020ல் 66,750 கார்களை விற்பனை செய்து சுமார் 33.14 சதவீத வளர்ச்சியைப் பதிவு செய்துள்ளது. கடந்த வருடம் இதே காலகட்டத்தில் ஹூண்டாய் 50,135 வாகனங்களை விற்பனை செய்துள்ளது குறிப்பிடத்தக்கது.

2019 டிசம்பரை ஒப்பிடுகையில் உள்நாட்டில் 24.89 சதவீதமும், ஏற்றுமதியில் 58.84 சதவீத வளர்ச்சி அடைந்துள்ளது. இதேபோல் 2020ல் ஹூண்டாய் மொத்தம் 5,22,542 வாகனங்களை விற்பனை செய்துள்ளது.

டாடா அதிரடி

டாடா மோட்டார்ஸ் நிறுவனம் ஹூண்டாய் நிறுவனத்தைப் போலவே டிசம்பர் மாதம் சுமார் 53,430 கார்களை விற்பனை செய்து சுமார் 21 சதவீத வளர்ச்சியை அடைந்துள்ளது.

உள்நாட்டு விற்பனையில் கடந்த வருடம் வெறும் 12,785 வாகனங்களை மட்டுமே விற்பனை செய்த டாடா மோட்டார்ஸ் இந்த வருடம் 84 சதவீத வளர்ச்சியில் 23,545 கார்களை விற்பனை செய்துள்ளது.

 

ஹோண்டா அருமை

கார் தயாரிப்பில் முன்னோடியாக இருக்கும் ஹோண்டா நிறுவனம் உள்நாட்டு விற்பனையில் கடந்த வருடம் 8,412 கார்களை விற்பனை செய்திருந்த நிலையில் டிசம்பர் 2020ல் 2.68 சதவீத வளர்ச்சியில் 8,638 கார்களை விற்பனை செய்துள்ளது.

மாருதி சுசூகி அசத்தல்

இந்தியாவின் முன்னணி மற்றும் மிகப்பெரிய கார் தயாரிப்பு நிறுவனமாக விளங்கும் மாருதி சுசூகி நிறுவனம் டிசம்பர் 2019ல் 1,33,296 வாகனங்களை விற்பனை செய்த நிலையில், 2020ல் 20.2 சதவீத வளர்ச்சியில் சுமார் 1,60,226 வாகனங்களை விற்பனை செய்து அசத்தியுள்ளது குறிப்பிடத்தக்கது.

இதில் 1,50,288 வாகனங்களை உள்நாட்டிலும், 9938 கார்களை வெளிநாட்டிலும் விற்பனை செய்து அசத்தியுள்ளது.