3 இன்சூரன்ஸ் நிறுவனங்கள்.. ரூ.10,000 கோடி ஐபிஓ கனவு.. நனவாகுமா..?!

இந்திய பங்குச்சந்தையில் ஏற்கனவே பல முன்னணி ஸ்டார்ட்அப் நிறுவனங்கள் ஐபிஓ வெளியிட தயாராகியிருக்கும் நிலையிலும், மத்திய அரசு பொது இன்சூரன்ஸ் நிறுவனங்கள் மீதான பங்கு இருப்பு கட்டுப்பாடுகளைத் தளர்த்துள்ள இந்த வேளையில் இன்சூரன்ஸ் மற்றும் இன்சூரன்ஸ் சேவை துறையைச் சேர்ந்த 3 இன்சூரன்ஸ் நிறுவனங்கள் ஐபிஓ வெளியிட திட்டமிட்டுள்ளது.+

3 இன்சூரன்ஸ் நிறுவனங்கள்

ஹெல்த் இன்சூரன்ஸ் சேவை பிரிவில் முன்னணி தனியார் நிறுவனமாக விளங்கும் ஸ்டார் ஹெல்த் அண்ட் அலையிட் இன்சூரன்ஸ் கம்பெனி, மெடிக்கல் இன்சூரன்ஸ் சேவையின் 3ஆம் தரப்பு நிர்வாக நிறுவனமான மெடி அசிஸ்ட் ஹெல்த்கேர் சர்வீசஸ் மற்றும் பாலிசிபஜார் தளத்தின் தாய் நிறுவனமான PB பின்டெக் ஆகிய 3 நிறுவனங்களும் ஐபிஓ வெளியிட சந்தை கட்டுப்பாட்டு ஆணையமான செபி-யிடம் விண்ணப்பம் சமர்ப்பித்துள்ளது.

40 நிறுவனங்கள் ஐபிஓ

2021ஆம் ஆண்டில் மட்டும் சுமார் 40 நிறுவனங்கள் ஐபிஓ வெளியிட்டு சுமார் 70,000 கோடி ரூபாய் அளவிலான முதலீட்டைத் திரட்டியுள்ளது. இதில் ஆகஸ்ட் மாதம் மட்டும் 5 நிறுவனங்கள் ஐபிஓ வெளியிட்டு மும்பை பங்குச்சந்தையில் பட்டியலிடப்பட்டு உள்ளது.

100 நிறுவனங்கள்

இதோடு ஆகஸ்ட் மாதம் மட்டும் புதிதாகச் சுமார் 24 நிறுவனங்கள் ஐபிஓ வெளியிட செபி அமைப்பிடம் விண்ணப்பம் கொடுத்துள்ளது. இதன் மூலம் முதலீட்டுச் சந்தை வல்லுனர்கள் 2021ஆம் ஆண்டு முடிவதற்குள் சுமார் 100 நிறுவனங்கள் ஐபிஓ மூலம் பட்டியலிடப்படும் என எதிர்பார்க்கின்றனர்.

பாலிசிபஜார் நிறுவனம்

சோமேட்டோ வெற்றிக்குப் பின் பல முன்னணி ஸ்டார்ட்அப் நிறுவனங்கள் ஐபிஓ வெளியிட ஆர்வம் காட்டி வரும் நிலையில் பாலிசிபஜார் நிறுவனம் மட்டும் ஐபிஓ மூலம் சுமார் 6,017 கோடி ரூபாய் அளவிலான முதலீட்டைத் திரட்ட இலக்கு நிர்ணயம் செய்துள்ளது.

PB பின்டெக் முதலீட்டாளர்

வழக்கம் போல் பிற இந்திய ஸ்டார்ட்அப் நிறுவனத்தைப் போலவே PB பின்டெக் நிறுவனமும் சீனாவின் முன்னணி முதலீட்டு நிறுவனங்களில் ஒன்றான டென்சென்ட் மற்றும் அமெரிக்காவைச் சேர்ந்த டைகர் குளோபல் நிறுவன முதலீடுகளில் இயங்கி வருகிறது.

4 முதலீட்டு நிறுவனங்கள்

இந்தியாவின் முன்னணி ஸ்டார்ட்அப் நிறுவனங்களில் 4 நிறுவனங்கள் பிரதானமாக முதலீடு செய்திருக்கும் சீனாவின் அலிபாபா, டென்சென்ட், அமெரிக்காவின் டைகர் குளோபல், ஜப்பான் நாட்டின் சாப்ட்பேங்க் ஆகியவற்றில் ஏதாவது ஒரு நிறுவனம் கட்டாயம் இருக்கும்.

ஸ்டார் ஹெல்த் மற்றும் மெடி அசிஸ்ட்

இதேபோல் ஸ்டார் ஹெல்த் நிறுவனம் இந்த ஐபிஓ மூலம் 3,000 கோடி ரூபாயும், மெடி அசிஸ்ட் நிறுவனம் 840-1000 கோடி ரூபாய் வரையில் முதலீட்டை திரட்ட விண்ணப்பம் செய்துள்ளது.

கனவு சாத்தியமா..?

இதன் மூலம் ஸ்டார் ஹெல்த் அண்ட் அலையிட் இன்சூரன்ஸ் கம்பெனி, மெடி அசிஸ்ட் ஹெல்த்கேர் சர்வீசஸ் மற்றும் PB பின்டெக் ஆகிய 3 இன்சூரன்ஸ் நிறுவனங்கள் இணைந்து ஐபிஓ மூலம் சுமார் 10,000 கோடி ரூபாய் அளவிலான முதலீட்டைத் திரட்ட இலக்கு நிர்ணயம் செய்துள்ளது.

இந்தக் கனவு சாத்தியமா..?

பொதுக் காப்பிட்டு வர்த்தக மசோதா

ஆகஸ்ட் 11ஆம் தேதி நாடாளுமன்றத்தில் கடும் எதிர்ப்புகள் தெரிவிக்கப்பட்ட போதிலும் மோடி தலைமையிலான மத்திய அரசு ராஜிய சபாவில் பொதுக் காப்பிட்டு வர்த்தக மசோதாவை அமலாக்கம் செய்யப்பட்டது.

பொதுத்துறை இன்சூரன்ஸ் நிறுவனங்கள்

பொதுக் காப்பிட்டு வர்த்தக மசோதா (General Insurance Amendment Bill) மூலம் பொதுத்துறை இன்சூரன்ஸ் நிறுவனத்தில் தனியார் பங்கீடு பெரிய அளவில் அதிகரிக்க முடியும். இதுமட்டும் அல்லாமல் இந்த மசோதா மூலம் பொதுத்துறை இன்சூரன்ஸ் நிறுவனத்தில் அரசு 51 சதவீத பங்குகளுக்குக் குறையாமல் வைத்திருக்க வேண்டும் என்ற கட்டுப்பாட்டை முழுமையாக நீக்கியுள்ளது.

தனியார்மயமாக்கல்

இதன் மூலம் தற்போது அரசு கட்டுப்பாட்டில் இருக்கும் காப்பீட்டு நிறுவனங்களை எளிதாகத் தனியார் நிறுவனங்களுக்கு விற்பனை செய்யப்பட்டு முதலீட்டைத் திரட்ட முடியும்.

4 இன்சூரன்ஸ் நிறுவனங்கள்

புதிய மசோதா மூலம் அரசு கட்டுப்பாட்டில் இருக்கும் நேஷனல் இன்சூரன்ஸ் கம்பெனி, நியூ இந்தியா அசூரன்ஸ் கம்பெனி, ஓரியென்டல் இன்சூரன்ஸ் கம்பெனி, யுனைடெட் இந்தியா இன்சூரன்ஸ் கம்பெனி ஆகியவை தனியார்மயமாக்கப்படும்.