சரிவில் பொருளாதாரம்! சாட்சி சொல்லும் PMI!

கொரோனா வைரஸ் பிரச்சனை உலகில் எந்த ஒரு நாட்டையும் விட்டு வைத்ததாகத் தெரியவில்லை. அமெரிக்கா தொடங்கி ஆப்கானிஸ்தான் வரை பாரபட்சம் இல்லாமல் எல்லா நாட்டு பொருளாதாரத்தையும் அடித்து நொறுக்கி இருக்கிறது. இதில் இந்தியா மட்டும் என்ன பெரிய விதி விலக்கை கண்டு இருக்க முடியும்.

இந்திய பொருளாதாரமும் வீழ்ச்சி அடைந்து இருக்கிறது என்பதை உறுதி செய்யும் விதத்தில் இந்தியாவின் உற்பத்திக்கான Purchasing Managers' Index (PMI) கடந்த ஜூலை 2020 மாதத்தில் 46-க்கு வந்து நிற்கிறது.

கடந்த ஜூன் 2020 மாதத்தில் இந்த Purchasing Managers' Index (PMI) 47.2 ஆக இருந்தது. பொதுவாக இந்த பி எம் ஐ புள்ளிகள் 50-க்கு மேல் இருந்தால் தான் வளர்ச்சியில் இருப்பதாகப் பார்ப்பார்கள்.

கடந்த ஏப்ரல் 2020-ல், வரலாறு காணாத அளவுக்கு, பி எம் ஐ 27.4 புள்ளிகளைத் தொட்டது இங்கு குறிப்பிடத்தக்கது. ஆனால் அதற்கு அடுத்தடுத்த மாதங்களில் தொடர்ந்து பி எம் ஐ ஏற்றம் கண்டு வருகிறது.

பி எம் ஐ மீண்டும் கீழ் நோக்கிப் போவதற்கான எல்லா சாத்தியக் கூறுகளும் அவுட் புட் & புதிய ஆர்டர்களில் தெரிகிறதாம். கொரோனா வைரஸ் லாக் டவுன் பிரச்சனையால், இன்னும் பல கம்பெனிகள் & நிறுவனங்களுக்கு வேலை கிடைக்காமல் போராடிக் கொண்டு இருக்கிறார்களாம். கொரோனா வைரஸ் பரவல் பிரச்சனை ஒரு முடிவுக்கு வர வேண்டும் அதோடு, கட்டுப்பாடுகளும் நீக்கப்பட வேண்டும் அதுவரை உற்பத்தியில் ஒரு முன்னேற்றத்தைப் பார்க்க முடியாது என்கிறார் ஐ ஹெச் எஸ் மார்கிட் நிறுவனத்தின் பொருளாதார வல்லுநர் எலியட் கெர் (Elliot Kerr).

ஒருவேளை கொரோனா வைரஸால் பாதிக்கப்படுபவர்களின் எண்ணிக்கை அதிகரித்தால், அது மேற்கொண்டு புதிய லாக் டவுன்களைக் கொண்டு வரும். அது இந்தியப் பொருளாதாரத்தின் அடிப்படையாக இருக்கும் உற்பத்தித் துறை மீண்டு வருவதற்கு, பெரிய தடையாக இருக்கும் என்கிறார் எலியட் கெர்.

இந்திய உற்பத்தித் துறையில் புதிய ஆர்டர்கள் தொடர்ந்து 4-வது மாதமாக சரிந்து இருக்கிறதாம். போதாக் குறைக்கு தொழிலாளர் பிரச்சனை, மூலப் பொருட்கள் சப்ளை செயின் பிரச்சனை வேறு இந்திய உற்பத்தித் துறையை படாத பாடு படுத்திக் கொண்டு இருக்கிறதாம்.