Russia: இந்தியா, சீனாவை விட்டால் வேற ஆள் இல்லை..!

ரஷ்ய அரசு நிறுவனங்களும், தனியார் நிறுவனங்களும் ஆர்க்டிக் பிராந்தியத்தில் இருந்து உற்பத்தி செய்யப்படும் கச்சா எண்ணெய்யைச் சீனாவிற்கும் இந்தியாவிற்கும் அதிகப்படியான தள்ளுபடியில் எப்போதும் இல்லாத வகையில் அதிகளவில் அனுப்பி வருகிறது.

ஐரோப்பிய நாடுகள் கடந்த மாதம் ரஷ்ய கச்சா எண்ணெய் இறக்குமதிக்கு மொத்தமாகத் தடை விதித்த நிலையில், புதிய சந்தைகளைத் தேடி தீவிரமாகப் பணியாற்றி வருகிறது.

ஆர்க்டிக் கச்சா எண்ணெய்

மே மாதத்திலிருந்து இந்தியாவிற்கான ஆர்க்டிக் கச்சா எண்ணெய் ஏற்றுமதி தொடர்ந்து அதிகரித்துள்ளது, குறிப்பாக நவம்பர் மாதத்தில் 6.67 மில்லியன் பேரல்களும், டிசம்பரில் 4.1 மில்லியன் பேரல்களும் ஏற்றுமதி செய்யப்பட்டு உள்ளது என Refinitiv தரவுகள் கூறுகிறது.

முக்கியக் கச்சா எண்ணெய் பொருட்கள்

இப்படி ஆர்டிக் பகுதியில் இருந்து ஏற்றுமதி செய்யப்படும் கச்சா எண்ணெய் பொருட்கள் பெரும்பாலானவை ஆர்கோ (Arco) மற்றும் ஆர்கோ/நோவி போர்ட் (Arco/Novy Port) தான். இதை ரஷ்யாவின் காஸ்ப்ரோம் நெஃப்ட் உற்பத்தி செய்து இந்தியாவுக்கு ஏற்றுமதி செய்யப்படுகிறது.

மர்மன்ஸ்க் துறைமுகம்

இதேபோல் கடந்த வாரம் மர்மன்ஸ்க் துறைமுகத்தில் ஏற்றப்பட்ட வரண்டே கச்சா எண்ணெய் (Varandey crude) சரக்குகள் முதல் முறையாக இந்தியா இறக்குமதி செய்தது.இது நவம்பர் மாத இறுதியில் ஏற்றுமதி செய்யப்பட்டது குறிப்பிடத்தக்கது.

ரஷ்யா - உக்ரைன் போர்

2022 ஆம் ஆண்டில் உலகையே புரட்டிப்போட்ட ரஷ்யா - உக்ரைன் போரின் பாதிப்பு 2023 ஆம் ஆண்டிலும் தொடர்கிறது. கொரோனா தொற்றுப் பாதிப்பில் இருந்து உலக நாடுகள் மீண்டு வந்த நிலையில் தற்போது மீண்டும் இதில் மாட்டிக் கொள்ளும் நிலை உருவாகியுள்ளது.

35000 கோடி ரூபாய்

ரஷ்யா - உக்ரைன் போர் துவங்கிய பிப்ரவரி மாதம் முதல் ரஷ்ய அதிபர் விளாடிமிர் புதின் 40 சதவீத தள்ளுபடி விலையில் இந்தியா கச்சா எண்ணெய் இறக்குமதி செய்தது மூலம் இந்தியா அரசு சுமார் 35000 கோடி ரூபாய் சேமித்துள்ளதாகக் கணிக்கப்பட்டு உள்ளது. ரஷ்யா-வில் தற்போது இந்தியா மற்றும் சீனா அதிகப்படியான கச்சா எண்ணெய் இறக்குமதி செய்து வருகிறது.

உக்ரைன் ஆதரவு நாடுகள்

உக்ரைனுக்கு ஆதரவாக இருக்கும் அனைத்து நாடுகளும் இணைந்து, இதில் குறிப்பாக ஐரோப்பிய நாடுகள், ஜி7 நாடுகள், ஆஸ்திரேலியா ஆகிய நாடுகள் இணைந்து ரஷ்யாவின் நிதி நிலையை முடக்க வேண்டும் என்பதற்காக அந்நாட்டின் முக்கிய வர்த்தகப் பொருளான கச்சா எண்ணெய் மீது டிசம்பர் மாதம் முதல் 60 டாலர் விலை வரம்பை விதித்தது.

60 டாலர்

அதாவது உக்ரைனுக்கு ஆதரவாக இருக்கும் அனைத்து நாடுகள், ரஷ்யாவிடம் இருந்து கச்சா எண்ணெய் வாங்கினால் அதற்கு 60 டாலர் மட்டுமே செலுத்த வேண்டும் என்று நிர்ணயம் செய்துள்ளது.

ரஷ்யாவுக்குச் செக்

சர்வதேச கச்சா எண்ணெய் சந்தையில் இதன் விலை எவ்வளவு உயர்ந்தாலும் 60 டாலருக்கு மட்டுமே விற்பனை செய்ய வேண்டும் என அறிவித்துள்ளது. இதேபோல் 60 டாலருக்கு மேல் பிற நாடுகளுக்கு விற்பனை செய்யும் போது சர்வதே அமைப்புகள் இன்சூரன்ஸ், கப்பல்கள் அளிக்கப்படாது எனவும் அறிவித்தது.

ஐரோப்பா

ஐரோப்பிய நாடுகள் ரஷ்யாவிடம் இருந்து கப்பல் வழியாக வாங்கும் கச்சா எண்ணெய்-க்குத் தடை விதிக்கப்பட்டு உள்ள நிலையில் ஜனவரி மாதம் முதல் ரஷ்யா வருவாய் இழப்பால் பாதிக்கப்படும், ஐரோப்பிய யூனியன் கச்சா எண்ணெய் பற்றாக்குறையால் பாதிக்கப்பட உள்ளது.