25 ஆண்டுகளாக Parle-G பிஸ்கட் விலை ரூ.5 தான். ... எப்படி சாத்தியம்?

Parle-G பிஸ்கட்

1994ஆம் ஆண்டு Parle-G நிறுவனம் 4 ரூபாய்க்கு ஒரு சிறிய பிஸ்கட் பாக்கெட்டை அறிமுகம் செய்தது. அன்று முதல் 2021ஆம் ஆண்டு வரை அதே விலையில் வழங்கி வந்த Parle-G, 2021அம் ஆண்டு ஒரு ரூபாய் உயர்த்தி ஐந்து ரூபாய் என விலை நிர்ணயம் செய்தது.

மலிவு விலை பிஸ்கட்

எளிதில் கிடைக்கக்கூடிய, மிக மலிவான விலையில் கிடைக்கும் Parle-G பிஸ்கட்டுகள் மக்களின் விருப்பத்திற்குரிய ஒன்றாக இருந்து வருகிறது. குறிப்பாக அதன் விலையை மாற்றாமல் 25 ஆண்டுகளாக ஒரே விலையில் எப்படி விற்பனை செய்கிறது என்பதுதான் பலரது ஒரு ஆச்சரியமான விஷயம். ஆனால் இதில் சில நுண்ணறிவு டெக்னிக் இருக்கிறது என்பதை சமூக வலைத்தளத்தில் ஒருவர் பதிவு செய்துள்ளார்.

25 ஆண்டுகளாக ஒரே விலை

1994ஆம் ஆண்டு முதல் 4 ரூபாய்க்கு விற்பனை செய்து வந்த Parle-G பிஸ்கெட் 2021 ஆம் ஆண்டு மட்டும் ஒரு ரூபாய் உயர்த்தி ஐந்து ரூபாய்க்கு விற்பனை செய்வது எப்படி சாத்தியம் என்று யாராவது யோசித்திருக்கிறீர்களா? ஒவ்வொரு ஆண்டும் விலைவாசி உயர்ந்து கொண்டே வரும் நிலையில் 25 ஆண்டுகளாக எப்படி ஒரு நிறுவனம் விலையை உயர்த்தாமல் தயாரிப்பை வழங்க முடியும் என்பது மிகப்பெரிய கேள்வி அல்லவா? என்று அவர் பதிவு செய்துள்ளார்.

அளவு குறைப்பு

பொதுவாக பிஸ்கட் என்று சொன்னாலே சிறிய பாக்கெட், பெரிய பாக்கெட் என்றுதான் மக்கள் நினைப்பார்களே தவிர அது எத்தனை கிராம் என்று யாரும் உற்று கவனிப்பது கிடையாது. இந்த நுண்ணறி டெக்னிக்கை தான் Parle-G பயன்படுத்தியுள்ளது. Parle-G நிறுவனம் விலையை உயர்த்துவதற்கு பதிலாக மெதுவாகவும் சீராகவும் அதன் அளவை குறைத்துக் கொண்டே வந்துள்ளது.

100 கிராம் முதல் 55 கிராம் வரை

முதலில் 100 கிராம் பாக்கெட் என அறிமுகம் செய்யப்பட்ட Parle-G பிஸ்கட், அதன் பிறகு சில ஆண்டுகளில் 92.5 கிராம் என்றும் அதன் பின்னர் 88 கிராம் என்றும் எடை அளவை மாற்றினார்கள். தற்போதைய நிலவரப்படி 5 ரூபாய்க்கு கிடைக்கும் சிறிய Parle-G பிஸ்கட் பாக்கெட் 55 கிராம் மட்டுமே எடை கொண்டது. அதாவது ஆரம்ப காலத்தில் இருந்த எடையை விட தற்போது 45 சதவீதம் குறைந்துள்ளது என்பது குறிப்பிடத்தக்கது.

க்ரேஸ்ஃபுல் டிகிராடேஷன்

பிஸ்கட் மட்டுமின்றி உருளைக்கிழங்கு சிப்ஸ், சாக்லேட் பார், டூத் பேஸ்ட் உள்ளிட்ட பல நிறுவனங்களும் இந்த வழியை பின்பற்றுகின்றன. விலை உயர்ந்தால் மக்கள் மத்தியில் ஒரு அதிருப்தி ஏற்படும் என்பதை புரிந்துகொண்ட இந்த நிறுவனங்கள் விலையை உயர்த்துவதற்கு பதிலாக அளவை குறைத்து வருகின்றன. இந்த நுட்பத்திற்கு க்ரேஸ்ஃபுல் டிகிராடேஷன் என்று பெயர். நுகர்வோர்கள் இதை பெரிதாக உணர மாட்டார்கள் என்றும் இந்த தந்திரத்தை பல நிறுவனங்கள் இந்தியாவில் மட்டுமின்றி உலகம் முழுவதும் கடைபிடித்து வருகின்றன என்பதும் குறிப்பிடத்தக்கது.