மே மாதம் இந்திய ஐடி நிறுவனங்கள் அடுத்தடுத்து தனது காலாண்டு முடிவுகளை வெளியிட்டதோடு, நிறுவனத்தின் நிதிநிலை அறிக்கையும் வெளியிட்டது. இந்த அறிக்கையில் அனைவராலும் கவனிக்கப்பட்டது நாட்டின் டாப் ஐடி நிறுவனங்களின் சிஇஓ சம்பளம் தான்.
முதலில் டிசிஎஸ் ராஜேஷ் கோபிநாதன் சம்பளம் வெளியான போது வியந்த மக்கள், இன்போசிஸ் சிஇஓ சலில் பாரிக் சம்பளத்தைப் பார்த்து அதிர்ச்சி அடைந்தனர். ஆனால் தற்போது விப்ரோ நிறுவனத்தில் புதிதாகச் சிஇஓவாகச் சேர்ந்துள்ள தியரி டெலாபோர்டே-வின் சம்பளத்தைப் பார்த்து மயக்கும் போடும் நிலைக்குத் தள்ளப்பட்டு உள்ளனர்.
இப்படி என்ன தான் சம்பளம் வாங்குவார் தியரி டெலாபோர்டே. வாங்க பார்த்திருவோம்.
கொரோனா தொற்றுக் காலம்
2020-21ஆம் நிதியாண்டில் கொரோனா தொற்றால் இந்திய உட்பட உலக நாடுகளில் அதிகளவிலான வர்த்தகம் பாதிக்கப்பட்ட வேலையில் இந்திய ஐடி நிறுவனங்கள் சிறிதும், பெரிதுமாகப் பல ஆட்டோமேஷன், கிளவுட் திட்டங்களை உலகம் முழுவதிலும் இருந்து பெற்றது. இதனால் ஐடி நிறுவனங்கள் வர்த்தகம் எதிர்பார்க்காத வகையில் அதிகரித்தது.
இன்போசிஸ், டிசிஎஸ் சிஇஓ சம்பளம்
இதன் எதிரொலியாக இந்திய ஐடி நிறுவனங்களின் சிஇஓ-க்களின் சம்பளம் பெரிய அளவில் அதிகரித்ததுள்ளது. கடந்த வருடம் டிசிஎஸ் சிஇஓ ராஜேஷ் கோபிநாதன் 20.4 கோடி ரூபாய் சம்பளத்தைப் பெற்ற நிலையில், இன்போசிஸ் சிஇஓ சலில் பாரிக் 49.8 கோடி ரூபாய் அளவிலான சம்பளத்தைப் பெற்றார்.
விப்ரோ சிஇஓ தியரி டெலாபோர்டே
இந்நிலையில் இன்று விப்ரோ நிறுவனத்தின் சிஇஓ-வான தியரி டெலாபோர்டே-வின் சம்பள விபரங்கள் வெளியாகியுள்ளது. 2020-21 நிதியாண்டுக்கு தியரி டெலாபோர்டே சுமார் 8.8 மில்லியன் டாலர் அதாவது 64 கோடி ரூபாய் அளவிலான சம்பளத்தைப் பெற்றுள்ளார். இதன் மூலம் இந்திய ஐடி துறையில் அதிகம் சம்பளம் வாங்கும் உயர் அதிகாரி என்ற பட்டத்தைப் பெற்றுள்ளார் தியரி டெலாபோர்டே.
விப்ரோ தியரி டெலாபோர்டே
ஜூலை 2020ல் விப்ரோ நிறுவனத்தின் சிஇஓ-வாகப் பதவியேற்ற தியரி டெலாபோர்டே கடந்த ஆண்டுக்கு 9.6 கோடி ரூபாய் அடிப்படை சம்பளமாகவும், 11.2 கோடி ரூபாய் கமிஷன் தொகையாகவும், 5.5 கோடி ரூபாய் நீண்ட கால ஊதியமாகவும், 37.81 கோடி ரூபாய் இதர வருமானம் என மொத்தம் 64 கோடி ரூபாய் அளவிலான சம்பளத்தைப் பெற்றுள்ளார்.
9 மாத சம்பளம் மட்டுமே
அனைத்திற்கும் மேலாக இந்தச் சம்பளம் ஜூலை 6 2020 முதல் மார்ச் 31, 2020 வரையிலான சம்பளம் மட்டுமே, அதாவது 9 மாதத்திற்கான சம்பளம் மட்டுமே என்பது குறிப்பிடத்தக்கது. தியரி டெலாபோர்டே விப்போ சிஇஓ-வாக நியமிக்கப்படும் போது 4.45 மில்லியன் யூரோ அதாவது 37.9 கோடி ரூபாய் சம்பளத்தில் தான் நியமிக்கப்பட்டார்.
விப்ரோ-வின் மாபெரும் வளர்ச்சி
ஆனால் இந்த 9 மாதத்தில் தியரி டெலாபோர்டே மூலம் ஏற்பட்ட வர்த்தக வளர்ச்சி, வருமானத்தில் ஏற்பட்ட தடாலடி வளர்ச்சி ஆகியவை இவரின் சம்பளத்தைக் கிட்டதட்ட இரட்டிப்பாக்கியுள்ளது. தியரி டெலாபோர்டே விடவும் இந்நிறுவனத்தின் தலைவர் ரிஷாத் பிரேம்ஜி குறைவான சம்பளம் வாங்குகிறார்.
விப்ரோ சேர்மேன் ரிஷாத் பிரேம்ஜி
விப்ரோ நிறுவனத்தின் சேர்மேன் ரிஷாத் பிரேம்ஜி 2021ஆம் நிதியாண்டுக்கு 11.76 கோடி ரூபாய் மட்டுமே சம்பளமாகப் பெற்றுள்ளார். இதேபோல் தலைமை நிதியியல் அதிகாரியான ஜத்தின் தலால் 7.43 கோடி ரூபாய் அளவிலான சம்பளத்தைப் பெறுகிறார்.
இந்திய ஐடி துறை
இந்திய ஐடி துறையில் பிரம்மாண்ட வளர்ச்சியில் பல கோடி இந்தியர்கள் வேலைவாய்ப்பு பெற்று நல்ல சம்பளத்துடன் தங்களது பொருளாதாரத்தில் பெரிய அளவிலான வளர்ச்சி அடைந்துள்ளனர். சொல்லப்போனால் இந்திய ஐடி நிறுவனங்கள் நடுத்தரக் குடும்பங்களுக்கு ஏணிப்படியாக இருந்துள்ளது என்றால் மிகையில்லை.